Saturday 27 December, 2008

ਖੂਹ 'ਤੇ ਘੜਾ ਭਰੇਂਦੀਏ ਮੁਟਿਆਰੇ ਨੀ

ਨਵਾਂ ਸਾਲ ਮੁਬਾਰਕ!!              ਨਵਾਂ ਸਾਲ ਮੁਬਾਰਕ!!             ਨਵਾਂ ਸਾਲ ਮੁਬਾਰਕ!!

ਖੂਹ 'ਤੇ ਇੱਕ ਮੁਟਿਆਰ ਘੜਾ ਭਰ ਰਹੀ ਹੈ। ਨਿਆਣੀ ਉਮਰੇ ਵਿਆਹੀ ਹੋਣ ਕਰਕੇ ਆਪਣੇ ਢੋਲ ਸਿਪਾਹੀ ਨੂੰ ਸਿਆਣਦੀ ਨਹੀਂ। ਲਾਮ ਤੋਂ ਪਰਤ ਕੇ ਆਇਆ ਉਸਦਾ ਸਿਪਾਹੀ ਪਤੀ ਉਸ ਤੋਂ ਪਾਣੀ ਦਾ ਘੁੱਟ ਮੰਗਦਾ ਹੈ। ਸਿਪਾਹੀ ਦੀ ਨੀਤ ਖੋਟੀ ਵੇਖ, ਮੁਟਿਆਰ ਉਸ ਨਾਲ ਸਿੱਧੇ ਮੂੰਹ ਗੱਲ ਨਹੀਂ ਕਰਦੀ। ਦੋਹਾਂ ਵਿੱਚ ਕੁੱਝ ਤਕਰਾਰ ਹੁੰਦਾ ਹੈ। ਅਖੀਰ ਸਿਪਾਹੀ ਘੋੜੇ 'ਤੇ ਸਵਾਰ ਹੋ ਕੇ ਮੁਟਿਆਰ ਤੋਂ ਪਹਿਲਾਂ ਆਪਣੇ ਸਹੁਰੇ ਘਰ ਪਹੁੰਚ ਜਾਂਦਾ ਹੈ। ਘਰ ਪਹੁੰਚਣ ਤੇ ਮੁਟਿਆਰ ਨੂੰ ਜਦੋਂ ਆਪਣੀ ਮਾਂ ਤੋਂ ਅਸਲੀਅਤ ਪਤਾ ਲਗਦੀ ਹੈ ਤਾਂ ਉਹ ਬੜ੍ਹੀ ਕੱਚੀ ਪੈਂਦੀ ਹੈ ਤੇ ਢੋਲ ਸਿਪਾਹੀ ਨੂੰ ਬੜ੍ਹੀਆਂ ਮਿੰਨਤਾਂ ਨਾਲ ਰਾਜ਼ੀ ਕਰਦੀ ਕਰਦੀ ਹੈ :

ਸਿਪਾਹੀ:

ਖੂਹ 'ਤੇ ਘੜਾ ਭਰੇਂਦੀਏ ਮੁਟਿਆਰੇ ਨੀ,
ਘੁੱਟ ਭਰ ਪਾਣੀ ਪਿਆ।
ਅਸੀਂ ਮੁਸਾਫ਼ਿਰ ਰਾਹੀ ਨੀ ਅੜੀਏ,
ਸਾਡਾ ਜੀਵੜਾ ਨਾ ਤਰਸਾ।

ਮੁਟਿਆਰ:

ਪਾਣੀ ਤਾਂ ਪੀ ਮੁਸਾਫਰਾ ਵੇ,
ਬੀਬਾ ਮੈਲੀ ਤੱਕ ਨਾ ਭੁੱਲ।
ਜਿਸ ਕੌਂਤ ਦੀ ਮੈਂ ਵਹੁਟੜੀ,
ਬੀਬਾ ਉਸ ਦਿਆਂ ਪਾਂਧਾਂ ਦਾ ਤੂੰ।

ਸਿਪਾਹੀ:

ਸੋਨੇ ਦੀ ਮੇਰੀ ਤੱਕੜੀ ਨੀ ਬੀਬੋ,
ਚਾਂਦੀ ਦਾ ਘਰ ਸੇਰ।
ਤੇਰੇ ਜਿਹੀਆਂ ਦੋ ਗੋਲੀਆਂ ਨੀ ਬੀਬੋ,
ਮੈਂ ਘਰ ਪਾਣੀ ਭਰੇਨ।

ਮੁਟਿਆਰ:

ਸੋਨੇ ਦੀ ਮੇਰੀ ਪਾਲਕੀ ਵੇ ਅੜਿਆ,
ਚਾਂਦੀ ਦਾ ਈ ਉਛਾੜ।
ਤੇਰੇ ਜਿਹੇ ਦੋ ਗੱਭਰੂ ਵੇ ਅੜਿਆ,
ਮੇਰੀ ਡੋਲੀ ਦੇ ਕਹਾਰ।

ਸਿਪਾਹੀ:

ਸਾਈਆਂ ਘੜਾ ਤੇਰਾ ਭਜ ਪਵੇ,
ਉੰਨੂ ਰਹਿ ਜਾਏ ਹੱਥ।
ਘਰੋਂ ਤਾਂ ਮਾਂ ਤੈਨੂੰ ਚਿੱਕ ਕੱਢੇ,
ਪੈ ਜਾਏਂ ਸਾਡੇ ਵੱਸ।

ਮੁਟਿਆਰ:

ਸਾਈਆਂ ਘੋੜਾ ਤੇਰਾ ਮਰ ਜਾਏ,
ਚਾਬੁਕ ਰਹਿ ਜਾਏ ਹੱਥ।
ਘਰੋਂ ਤਾਂ ਮਾਂ-ਪਿਓ ਕੁੱਟ ਕੱਢੇ,
ਪੈ ਜਾਏਂ ਸਿਪਾਹੀਆਂ ਵੱਸ।

(ਮੁਟਿਆਰ ਘਰ ਜਾਂਦੀ ਹੈ ਤਾਂ ਉਸਦੀ ਮਾਂ ਪੁੱਛਦੀ ਹੈ)
ਮਾਂ:

ਕੀ ਮੋਈਏ, ਕੀ ਮਾਰੀਏ, ਨੀ ਧੀਏ !
ਕੇ ਗਈਂ ਏ ਪਾਰਾਵਾਰ।
ਵੱਡੇ ਵੇਲੇ ਦੀ ਘੜਾ ਭਰਨ ਗਈਏਂ,
ਆਈ ਏਂ ਸੋਤੜਾ ਪਾ।

ਮੁਟਿਆਰ:

ਨਾ ਮੋਈ ਮਾਰੀ, ਮੇਰੀ ਅੰਬੜੀਏ,
ਨਾ ਗਈ ਪਾਰਾਵਾਰ।
ਉੱਚਾ ਲੰਮਾ ਇੱਕ ਗੱਭਰੂ, ਨੀ ਅੰਬੜੀਏ,
ਕਰ ਬੈਠਾ ਤਕਰਾਰ।

(ਫਿਰ ਘੋੜੇ ਵੱਲ ਵੇਖਕੇ)
ਮੁਟਿਆਰ:

ਇਹ ਕਿਸ ਦੇ ਘੋੜੇ ਜੋੜੇ ਨੀ ਅੰਬੜੀਏ,
ਇਹ ਕਿਸ ਦੇ ਹਥਿਆਰ।

ਮਾਂ:

ਜਿਦ੍ਹੇ ਨਾਲ ਤੂੰ ਪਰਨਾਈ ਨੀ ਧੀਏ,
ਉਹ ਆਇਆ ਅਸਵਾਰ।

(ਫਿਰ ਢੋਲ ਸਿਪਾਹੀ ਨੂੰ ਮਨਾਣ ਜਾਂਦੀ ਹੈ)
ਮੁਟਿਆਰ:

ਕੇ ਸੁੱਤਾ ਕੇ ਜਾਗਦਾ ਵੇ ਚੰਨਾਂ !
ਵੇ ਕੀ ਤੂੰ ਗਿਓਂ ਪਾਰਵਾਰ।

ਸਿਪਾਹੀ:

ਨਾ ਸੁੱਤਾ ਨਾ ਜਾਗਦਾ ਨੀ,
ਤੂੰ ਖੂਹੇ ਦੇ ਬੋਲ ਚਿਤਾਰ।

ਮੁਟਿਆਰ:

ਨਿੱਕਿਆਂ ਹੁੰਦਿਆਂ ਹੋ ਗਈਆਂ ਵੇ ਬੀਬਾ,
ਹੁਣ ਤੇ ਮਨੋਂ ਵਿਸਾਰ।



"ਪੰਜਾਬ ਦੀ ਲੋਕ ਧਾਰਾ" (ਸੋਹਿੰਦਰ ਸਿੰਘ ਬੇਦੀ) 'ਚੋਂ ਧੰਨਵਾਦ ਸਹਿਤ

Wednesday 24 December, 2008

ਤੈਂ ਛਤਰੀ ਨਾ ਤਾਣੀ

ਨੌਕਰ ਨੂੰ ਤਾਂ ਨਾਰ ਪਿਆਰੀ
ਜਿਉਂ ਵਾਹਣਾ ਨੂੰ ਪਾਣੀ
ਲੱਗੀ ਦੋਸਤੀ ਚੱਕੀਆਂ ਸ਼ਰਮਾਂ
ਰੋਟੀ 'ਕੱਠਿਆਂ ਖਾਣੀ
ਭਿੱਜ ਗਈ ਬਾਹਰ ਖੜੀ
ਤੈਂ ਛਤਰੀ ਨਾ ਤਾਣੀ
.............
ਨਾ ਵੇ ਪੂਰਨਾ ਚੋਰੀ ਕਰੀਏ
ਨਾ ਵੇ ਮਾਰੀਏ ਡਾਕਾ
ਬਾਰਾਂ ਬਰਸ ਦੀ ਸਜ਼ਾ ਬੋਲਜੂ
ਪੀਹਣਾ ਪੈ ਜੂ ਆਟਾ
ਨੇੜੇ ਆਈ ਦੀ ਬਾਂਹ ਨਾ ਫੜੀਏ
ਲੋਕ ਕਹਿਣਗੇ ਡਾਕਾ
ਕੋਠੀ ਪੂਰਨ ਦੀ
ਵਿੱਚ ਪਰੀਆਂ ਦਾ ਵਾਸਾ
.............
ਵਿੱਚ ਬਾਗਾਂ ਦੇ ਸੋਹੇ ਕੇਲਾ
ਖੇਤਾਂ ਵਿੱਚ ਰਹੂੜਾ
ਤੈਨੂੰ ਵੇਖ ਕੇ ਤਿੰਨ ਵਲ ਖਾਵਾਂ
ਖਾ ਕੇ ਮਰਾਂ ਧਤੂਰਾ
ਕਾਹਨੂੰ ਪਾਇਆ ਸੀ
ਪਿਆਰ ਵੈਰਨੇ ਗੂੜ੍ਹਾ
.............
ਆ ਵਣਜਾਰਿਆ ਬਹਿ ਵਣਜਾਰਿਆ
ਆਈਂ ਹਮਾਰੇ ਘਰ ਵੇ
ਚਾਰ ਕੁ ਕੁੜੀਆਂ ਕਰ ਲੂੰ 'ਕੱਠੀਆਂ
ਕਿਉਂ ਫਿਰਦਾ ਦਰ ਦਰ ਵੇ
ਝਿੜਕਾਂ ਰੋਜ਼ ਦੀਆਂ
ਮੈਂ ਜਾਉਂਗੀ ਮਰ ਵੇ
.............
ਮੈਲਾ ਕੁੜਤਾ ਸਾਬਣ ਥੋੜੀ
ਬਹਿ ਪਟੜੇ ਤੇ ਧੋਵਾਂ
ਪਾਸਾ ਮਾਰ ਕੇ ਲੰਘ ਗਿਆ ਕੋਲ ਦੀ
ਛੰਮ ਛੰਮ ਅੱਖੀਆਂ ਰੋਵਾਂ
ਬਾਹੋਂ ਫੜ ਕੇ ਪੁਛਣ ਲੱਗੀ
ਕਦੋਂ ਕਰੇਂਗਾ ਮੋੜੇ
ਵੇ ਆਪਣੇ ਪਿਆਰਾਂ ਦੇ
ਮੌਤੋਂ ਬੁਰੇ ਵਿਛੋੜੇ
.............



Saturday 20 December, 2008

ਕੁੱਝ ਪ੍ਰੇਰਣਾਮਈ ਸ਼ਬਦ......


ਡਾ. ਨਾਹਰ ਸਿੰਘ,( M.A,Ph. D)ਦੀ ਕਿਤਾਬ "ਲੌਂਗ ਬੁਰਜੀਆਂ ਵਾਲਾ" ਦੀ ਭੂਮਿਕਾ 'ਚੋਂ
(ਇਹ ਬਲਾਗ ਆਪਣੀਆਂ ਕਈ ਪੋਸਟਿੰਗਾਂ ਲਈ ਇਸ ਕਿਤਾਬ ਦਾ ਰਿਣੀ ਹੈ। )

ਹੁਣਵੇਂ ਦੌਰ ਵਿੱਚ ਲੋਕ ਗੀਤ ਇਕੱਤਰ ਕਰਨ ਦਾ ਕੰਮ ਬਹੁਤ ਕਠਿਨ ਹੁੰਦਾ ਜਾ ਰਿਹਾ ਹੈ। ਮਧਕਾਲੀਨ ਜੀਵਨ ਧਾਰਾ ਨਾਲ ਸੰਬੰਧਿਤ ਬਹੁਤ ਸਾਰਾ ਸਾਹਿਤ ਅਲੋਪ ਹੋ ਚੁੱਕਾ ਹੈ। ਜੋ ਬਚਿਆ ਹੈ ਉਸ ਨੂੰ ਬਜ਼ੁਰਗਾਂ ਦੇ ਚੇਤਿਆਂ ਵਿੱਚੋਂ ਖੁਰਚ ਕੇ ਲੜੀਵੱਧ ਕਰਨਾ ਜੇ ਅਸੰਭਵ ਨਹੀਂ ਤਾਂ ਕਠਿਨ ਜਰੂਰ ਹੈ। ਮੈਂ ਇਹ ਮਹਿਸੂਸ ਕਰਦਾ ਹਾਂ ਕਿ ਇਹ ਕੰਮ ਕਿਸੇ ਵੱਡੀ ਸੰਸਥਾ ਵਲੋਂ ਪ੍ਰਦਾਨ ਕੀਤੇ ਸਾਧਨਾਂ ਨਾਲ ਬਕਾਇਦਾ ਸਿਖਿਅਤ ਬੰਦਿਆਂ ਤੋਂ ਕਰਵਾਉਣ ਦਾ ਹੈ। ਹਰ ਖੇਤਰ ਦੇ ਲੋਕ ਗੀਤ (ਲੋਕ ਧਾਰਾ) ਇੱਕਤਰ ਕਰਨ ਲਈ ਵੱਕੋ ਵੱਖਰੀਆਂ ਟੀਮਾਂ ਦੀ ਲੋੜ ਹੈ। ਹਰ ਟੀਮ ਦੇ ਮੈਂਬਰ ਸੰਬੰਧਿਤ ਖਿੱਤੇ ਦੇ ਜੰਮਪਲ, ਉਪਭਾਸ਼ਾ ਤੋਂ ਸਿਧਾਂਤਕ ਤੌਰ 'ਤੇ ਜਾਣੂ ਤੇ ਆਪੋ ਆਪਣੇ ਇਲਾਕਾਈ ਸਭਿਆਚਾਰਾਂ ਵਿਚ ਘੁਲੇ ਮਿਲੇ ਹੋਏ ਹੋਣੇ ਚਾਹੀਦੇ ਹਨ । ਦਿਨੋਂ ਦਿਨ ਵਿਸਰ ਰਹੀ ਇਸ ਸਭਿਆਚਾਰਕ ਵਿਰਾਸਤ ਨੂੰ ਸਾਂਭਣ ਤੇ ਜੀਵਨ ਦੇ ਨਵੇਂ ਪ੍ਰਸੰਗਾਂ ਅਨੁਸਾਰ ਇਸ ਤੋਂ ਸਿਰਜਨਾਤਮਕ ਪ੍ਰੇਰਨਾਵਾਂ ਲੈਣ ਲਈ ਇਕ ਜ਼ੋਰਦਾਰ ਸਭਿਆਚਾਰਕ ਲਹਿਰ ਖੜ੍ਹੀ ਕਰਨ ਦੀ ਲੋੜ ਹੈ। ਜੀਵਨ ਪ੍ਰਤੀ ਨਿਰੋਏ ਦ੍ਰਿਸ਼ਟੀਕੋਣ ਤੋਂ ਉਸਰੀ ਅਜਿਹੀ ਲਹਿਰ ਹੀ ਲੋਕਾਂ ਨੂੰ ਆਪਣੇ ਆਪੇ ਤੋਂ ਚੇਤੰਨ ਕਰ ਸਕਦੀ ਹੈ। ਆਪਣੇ ਦੇਸੀ ਸਭਿਆਚਾਰ, ਪ੍ਰੰਪਰਾਵਾਂ ਤੇ ਇਤਿਹਾਸ ਨੂੰ ਸਮਝਣ ਲਈ ਵਿਗਿਆਨਕ ਦ੍ਰਿਸ਼ਟੀ ਤੋਂ ਪ੍ਰਾਪਤ ਹੋਈ ਨਵੀਂ ਸੋਝੀ ਲੈ ਕੇ ਹੀ ਅਸੀਂ ਆਪਣੇ ਸਭਿਆਚਾਰ ਉੱਤੇ ਹਾਵੀ ਸਾਮਰਾਜ ਦੀ ਜ਼ਿਹਨੀ ਗ਼ੁਲਾਮੀ ਤੇ ਭੂਪਵਾਦ ਦੀਆਂ ਵੇਲਾ ਵਿਹਾ ਚੁੱਕੀਆਂ ਕਦਰਾਂ ਕੀਮਤਾਂ ਤੋਂ ਮੁਕਤ ਹੋ ਸਕਾਂਗੇ। ਆਪਣੀ ਮਿੱਟੀ 'ਚੋਂ ਉਪਜੀ ਸਿਰਜਨਾਤਮਕ ਸੁਤੰਤਰ ਸੋਚ ਹੀ ਸਾਨੂੰ ਪੱਕੇ ਪੈਰੀਂ ਖੜ੍ਹਾ ਕਰ ਸਕਦੀ ਹੈ।

Tuesday 16 December, 2008

ਲਾ ਕੇ ਤੋੜ ਨਿਭਾਵਾਂ

ਪ੍ਰੀਤਾਂ ਮੈਨੂੰ ਕਦਰ ਬਥੇਰੀ
ਲਾ ਕੇ ਤੋੜ ਨਿਭਾਵਾਂ
ਕੋਇਲੇ ਸਾਉਣ ਦੀਏ
ਤੈਨੂੰ ਹੱਥਾਂ 'ਤੇ ਚੋਗ ਚੁਗਾਮਾਂ
...............
ਜੇਠ ਹਾੜ ਦੇ ਤੱਤੇ ਮਹੀਨੇ
ਤੱਤੀਆਂ ਚੱਲਣ ਹਵਾਵਾਂ
ਤੈਨੂੰ ਧੁੱਪ ਲਗਦੀ
ਮੈਂ ਬਦਲੀ ਬਣ ਜਾਵਾਂ
...............
ਹੀਰਿਆਂ ਹਰਨਾ ਬਾਗੀ ਚਰਨਾਂ
ਬਾਗ ਨੇ ਨੇੜੇ ਤੇੜੇ
ਮਿੱਤਰਾਂ ਨੂੰ ਯਾਦ ਕਰਾਂ
ਹਰ ਚਰਖੇ ਦੇ ਗੇੜੇ
...............
ਬਾਗ ਲਵਾਇਆ ਬਗੀਚਾ ਲਵਾਇਆ
ਵਿੱਚ ਵਿੱਚ ਬੋਲਣ ਮੋਰ
ਦੁਨੀਆਂ ਲੱਖ ਫਿਰਦੀ
ਮੈਨੂੰ ਤੇਰੇ ਜਿਹਾ ਨਾ ਕੋਈ ਹੋਰ
...............
ਭਾਰਾ ਮੁਲਕ ਮਾਹੀ ਦਾ ਵਸੇ
ਨਾ ਮੇਰਾ ਨਾ ਤੇਰਾ
ਚੰਨ ਭਾਵੇਂ ਨਿੱਤ ਚੜ੍ਹਦਾ
ਸਾਨੂੰ ਸੱਜਣਾ ਬਾਝ ਹਨੇਰਾ
...............

Friday 12 December, 2008

ਤੇਰਾ ਮੇਰਾ ਇੱਕ ਮਨ ਵੇ

ਜੇਰਾ ਜੇਰਾ ਜੇਰਾ
ਪੂਣੀਆਂ ਮੈਂ ਢਾਈ ਕੱਤੀਆਂ
ਟੁੱਟ ਪੈਣੇ ਦਾ ਤੇਰਵ੍ਹਾਂ ਗੇੜਾ
ਨੰਘ ਗਿਆ ਨੱਕ ਵੱਟ ਕੇ
ਤੈਨੂੰ ਮਾਣ ਵੇ ਚੰਦਰਿਆ ਕਿਹੜਾ
ਸ਼ੀਸ਼ਾ ਦੇਖ ਲੈ ਕੇ ਮੁੰਡਿਆ
ਤੇਰੇ ਰੰਗ ਤੋਂ ਤੇਜ ਰੰਗ ਮੇਰਾ
ਝਾਕਦੀ ਦੀ ਅੱਖ ਪਕਗੀ
ਕਦੇ ਪਾ ਵਤਨਾਂ ਵੱਲ ਫੇਰਾ
...............
ਲੋਈ ਲੋਈ ਲੋਈ
ਲੁਕ ਛਿਪ ਮਿਲ ਮਿੱਤਰਾ
ਕਾਹਨੂੰ ਕਰਦਾ ਫਿਰੇਂ ਬਦਖੋਈ
ਜੱਗ ਵਿੱਚ ਵਸਦਾ ਰਹੇਂ
ਹੱਥ ਬੰਨ੍ਹ ਕੇ ਕਰਾਂ ਅਰਜੋਈ
ਭੁੱਖ ਤੇਰੇ ਦਰਸ਼ਣ ਦੀ
ਮੈਨੂੰ ਹੋਰ ਨਾ ਤ੍ਰਿਸ਼ਣਾ ਕੋਈ
...............
ਡਾਕੇ ਡਾਕੇ ਡਾਕੇ
ਜਾਂਦੀ ਜੱਟੀ ਮੇਲੇ ਨੂੰ
ਤੁਰਦੀ ਨਾਗਵਲ ਖਾ ਕੇ
ਗੁੱਟ ਤੇ ਪਵਾਉਣੀ ਮੋਰਨੀ
ਮੈਂ ਤਾਂ ਵਿੱਚ ਮੇਲੇ ਦੇ ਜਾ ਕੇ
ਤੈਨੂੰ ਪੱਟ ਲੈਣਗੇ
ਜੱਟ ਫਿਰਦੇ ਹੱਥਾਂ ਨੂੰ ਥੁੱਕ ਲਾ ਕੇ
ਕਰਦੂੰ ਗਜ ਵਰਗਾ
ਕੋਈ ਦੇਖੇ ਤਾਂ ਜੱਟੀ ਨੂੰ ਹੱਥ ਲਾ ਕੇ
ਨਾ ਜਾਈਂ ਮੇਲੇ ਨੂੰ
ਕੋਈ ਲੈ ਜੂ ਜੇਬ 'ਚ ਪਾ ਕੇ
...............
ਚਾਦੀਂ ਚਾਦੀਂ ਚਾਦੀਂ
ਸੁੱਤਿਆ ਜਾਗ ਪੂਰਨਾ
ਤੇਰੇ ਕੋਲ ਦੀ ਕੁਆਰੀ ਕੁੜੀ ਜਾਂਦੀ
ਕੁਆਰੀ ਦਾ ਐਸਾ ਹੁਸਨ ਐ
ਜਿਉਂ ਗਰਸਾਂ ਦੀ ਚਾਂਦੀ
ਵਿੱਛੜੇ ਮਿਤਰਾਂ ਦੀ
ਸੋਚ ਹੱਡਾਂ ਨੂੰ ਖਾਂਦੀ
...............
ਮੱਠੀਆਂ ਮੱਠੀਆਂ ਮੱਠੀਆਂ
ਤੇਰਾ ਮੇਰਾ ਇੱਕ ਮਨ ਵੇ
ਤੇਰੀ ਮਾਂ ਨੇ ਦਰੈਤਾਂ ਰੱਖੀਆਂ
ਤੈਨੂੰ ਦੇਵੇ ਕੁੱਟ ਚੂਰੀਆਂ
ਮੈਨੂੰ ਚੰਦਰੇ ਘਰਾਂ ਦੀਆਂ ਲੱਸੀਆਂ
ਤੇਰੇ ਫਿਕਰਾਂ 'ਚ
ਰੋਜ ਘਟਾਂ ਤਿੰਨ ਰੱਤੀਆਂ
...............

Sunday 7 December, 2008

ਪਿਆਰੀ ਤੂੰ ਲਗਦੀ

ਸੁਣ ਵੇ ਮੁੰਡਿਆ ਕੈਂਠੇ ਵਾਲਿਆ
ਕੈਂਠਾ ਪਾਲਸ਼ ਕੀਤਾ
ਮੈਂ ਤਾਂ ਤੈਨੂੰ ਖੜੀ ਉਡੀਕਾਂ
ਤੂੰ ਤੁਰ ਗਿਆ ਚੁੱਪ ਕੀਤਾ
ਜੋੜੀ ਨਾ ਬਣਦੀ
ਪਾਪ ਜਿਨ੍ਹਾਂ ਦਾ ਕੀਤਾ
.............
ਤਾਵੇ ਤਾਵੇ ਤਾਵੇ
ਰਾਹ ਸੰਗਰੂਰਾਂ ਦਾ
ਮੁੰਡਾ ਪੜ੍ਹਨ ਕਾਲਜੇ ਜਾਵੇ
ਰਾਹ ਵਿਚ ਕੁੜੀ ਟੱਕਰੀ
ਮੁੰਡਾ ਦੇਖ ਕੇ ਨੀਵੀਂਆਂ ਪਾਵੇ
ਫੇਲ੍ਹ ਕਰਾਤਾ ਨੀ
ਤੈਂ ਲੰਮੀਏਂ ਮੁਟਿਆਰੇ
.............
ਕਾਲੀ ਚੁੰਨੀ ਲੈਨੀ ਆ ਕੁੜੀਏ
ਬਚ ਕੇ ਰਹੀਏ ਜਹਾਨੋਂ
ਚੰਗੇ ਬੰਦਿਆਂ ਨੂੰ ਲੱਗਣ ਤੁਹਮਤਾਂ
ਗੋਲੇ ਡਿੱਗਣ ਅਸਮਾਨੋਂ
ਪਿਆਰੀ ਤੂੰ ਲਗਦੀ
'ਕੇਰਾਂ ਬੋਲ ਜਬਾਨੋਂ
.............
ਕੋਰਾ ਕਾਗਜ਼ ਨੀਲੀ ਸਿਆਹੀ
ਗੂੜ੍ਹੇ ਅੱਖਰ ਪਾਵਾਂ
ਨਹੀਂ ਤਾਂ ਗੱਭਰੂਆ ਆਜਾ ਘਰ ਨੂੰ
ਲੈ ਆ ਕਟਾ ਕੇ ਨਾਮਾ
ਭਰੀ ਜਵਾਨੀ ਇਓਂ ਢਲ ਜਾਂਦੀ
ਜਿਓਂ ਬਿਰਛਾਂ ਦੀਆਂ ਛਾਵਾਂ
ਇਸ ਜਵਾਨੀ ਨੂੰ
ਕਿਹੜੇ ਖੂਹ 'ਚ ਪਾਵਾਂ
ਜਾਂ
ਸੱਸੀਏ ਮੋੜ ਪੁੱਤ ਨੂੰ
ਹੱਥ ਜੋੜ ਕੇ ਵਾਸਤੇ ਪਾਵਾਂ
.............
ਇਸ਼ਕ-ਮੁਸ਼ਕ ਗੁੱਝੇ ਨਾ ਰਹਿੰਦੇ
ਲੋਕ ਸਿਆਣੇ ਕਹਿੰਦੇ
ਬਾਗਾਂ ਦੇ ਵਿੱਚ ਕਲੀਆਂ ਉੱਤੇ
ਆਣ ਕੇ ਭੌਰੇ ਬਹਿੰਦੇ
ਲੋਕੀਂ ਭੈੜੇ ਸ਼ੱਕ ਕਰਦੇ
ਚਿੱਟੇ ਦੰਦ ਹਸਣੋ ਨਾ ਰਹਿੰਦੇ
.............

Monday 1 December, 2008

ਵੀਰ ਮੇਰੇ ਨੇ...

ਵੀਰ ਮੇਰੇ ਨੇ ਕੁੜ੍ਹਤੀ ਦਿੱਤੀ
ਭਾਬੋ ਨੇ ਫੁਲਕਾਰੀ
ਨੀ ਜੱਗ ਜੀਅ ਭਾਬੋ
ਲੱਗੇਂ ਵੀਰ ਤੋਂ ਪਿਆਰੀ
...............
ਵੀਰ ਮੇਰੇ ਨੇ ਪੱਠੇ ਲਿਆਂਦੇ
ਵਿੱਚ ਲਿਆਂਦੇ ਆਗ
ਨੀ ਸਤ ਵੰਨੀਏ ਭਾਬੋ
ਕਦੇ ਤਾਂ ਬੀਬੀ ਆਖ
...............
ਵੀਰ ਮੇਰੇ ਨੇ ਚਰਖਾ ਦਿੱਤਾ
ਵਿਚ ਲਵਾਈਆਂ ਮੇਖਾਂ
ਵੀਰਾ ਤੈਨੂੰ ਯਾਦ ਕਰਾਂ
ਮੈਂ ਜਦ ਚਰਖੇ ਵੱਲ ਵੇਖਾਂ
..............
ਵੀਰ ਮੇਰੇ ਨੇ ਕੁੜ੍ਹਤੀ ਭੇਜੀ
ਉਹ ਵੀ ਆ ਗਈ ਠੀਕ
ਜਦ ਮੈਂ ਪਾ ਨਿੱਕਲੀ
ਜਲ ਜਲ ਜਾਣ ਸ਼ਰੀਕ
..............
ਵੀਰ ਮੇਰੇ ਨੇ ਖੂਹ ਲਵਾਇਆ
ਵਿਚ ਸੁੱਟੀਆਂ ਤਲਵਾਰਾਂ
ਚਰਖ਼ੇ ਸੁੰਨੇ ਪਏ
ਕਿੱਧਰ ਗਈਆਂ ਮੁਟਿਆਰਾਂ
..............

Wednesday 26 November, 2008

ਵਗਦੀ ਰਾਵੀ ਦੇ ਵਿੱਚ

ਵਗਦੀ ਰਾਵੀ ਦੇ ਵਿੱਚ
ਸੁਰਮਾ ਕੀਹਨੇ ਡੋਲ੍ਹਿਆ
ਸੱਸੜੀ ਦਾ ਪੁੱਤ ਕਦੇ
ਹੱਸ ਕੇ ਨਾ ਬੋਲਿਆ
..............
ਵਗਦੀ ਰਾਵੀ ਦੇ ਵਿੱਚ
ਰੁੜ੍ਹਨ ਸ਼ਤੀਰ ਵੇ
ਮਾਣ ਜਵਾਨੀ ਢੋਲਾ
ਸਾਡੀ ਤਾਂ ਅਖੀਰ ਵੇ
..............
ਵਗਦੀ ਰਾਵੀ ਦੇ ਵਿੱਚ
ਰੁੜ ਗਏ ਪਤਾਸੇ ਵੇ
ਆਪ ਤੁਰ ਗਇਓਂ
ਨਾਲ ਲੈ ਗਿਆ ਤੂੰ ਹਾਸੇ ਵੇ
..............
ਵਗਦੀ ਰਾਵੀ ਦੇ ਵਿੱਚ
ਘੁੱਗੀਆਂ ਦਾ ਜੋੜਾ ਵੇ
ਇੱਕ ਘੁਗੀ ਉੱਡੀ
ਲੰਮਾ ਪੈ ਗਿਆ ਵਿਛੋੜਾ ਵੇ
..............
ਵਗਦੀ ਰਾਵੀ ਦੇ ਵਿੱਚ
ਸੁੱਟਦੀ ਆਂ ਮੇਖਾਂ
ਬਣ ਪਟਵਾਰੀ
ਤੈਨੂੰ ਲਿਖਦੇ ਨੂੰ ਦੇਖਾਂ
..............

Saturday 22 November, 2008

ਵਗਦੀ ਰਾਵੀ ਦੇ ਵਿੱਚ

ਵਗਦੀ ਰਾਵੀ ਦੇ ਵਿੱਚ
ਨ੍ਹਾਉਣ ਨੀ ਕੁਆਰੀਆਂ
ਕੰਨੀਂ ਬੁੰਦੇ ਨੀ ਸਈਓ
ਅੱਖਾਂ ਲੋੜ੍ਹੇ ਮਾਰੀਆਂ
............
ਵਗਦੀ ਰਾਵੀ ਦੇ ਵਿੱਚ
ਦੋ ਸਾਧੂ ਨ੍ਹਾਉਂਦੇ
ਚੱਕ ਦੇ ਪੱਲਾ ਨੀ
ਤੇਰੇ ਪੈਰੀਂ ਹੱਥ ਲਾਉਂਦੇ
............
ਵਗਦੀ ਰਾਵੀ ਦੇ ਵਿੱਚ
ਦੋ ਸਾਧੂ ਨ੍ਹਾਉਂਦੇ
ਕਿੱਕਣ ਚੱਕਾਂ ਵੇ
ਘਰ ਡੰਡਾ ਖੜਕਾਉਂਦੇ
............
ਵਗਦੀ ਰਾਵੀ ਦੇ ਵਿੱਚ
ਸਾਗ ਚਲਾਈ ਦਾ
ਮੈਂ ਨਾ ਜੰਮਦੀ ਮਾਹੀਆ
ਵੇ ਤੂੰ ਕਿੱਥੋਂ ਵਿਆਹੀਦਾ
............
ਵਗਦੀ ਰਾਵੀ ਦੇ ਵਿੱਚ
ਗੰਨੇ ਦੀਆਂ ਗੰਨੇਰੀਆਂ
ਤੂੰ ਨਾ ਜੰਮਦੀ ਗੋਰੀਏ
ਨੀ ਮੈਨੂੰ ਹੋਰ ਬਥੇਰੀਆਂ
............
ਵਗਦੀ ਰਾਵੀ ਦੇ ਵਿੱਚ
ਸੁੱਟਦੀ ਆਂ ਆਨਾ
ਖੋਲ੍ਹ ਕੇ ਜਾਈਂ ਵੇ
ਸਾਡਾ ਸ਼ਗਨਾ ਦਾ ਗਾਨਾ
............
ਵਗਦੀ ਸੀ ਰਾਵੀ
ਵਿੱਚ ਘੁੱਗੀਆਂ ਦਾ ਜੋੜਾ
ਇੱਕ ਘੁੱਗੀ ਉੱਡੀ
ਲੰਮਾ ਪੈ ਗਿਆ ਵਿਛੋੜਾ
............

Friday 14 November, 2008

ਸੂਰਾ ਸੋ ਪਹਿਚਾਨੀਐ (ਸ਼ਰਧਾਂਜਲੀ)

( 16 ਨਵੰਬਰ ਨੂੰ ਗ਼ਦਰ ਲਹਿਰ ਦੇ "ਬਾਲਾ ਜਰਨੈਲ" ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੀ 93ਵੀਂ ਬਰਸੀ ਹੈ । ਸੰਨ 1915 'ਚ ਆਪ ਨੂੰ ਫ਼ਾਂਸੀ ਦਿੱਤੀ ਗਈ । ਉਸ ਵਕਤ ਆਪਦੀ ਉਮਰ 20 ਵਰ੍ਹਿਆਂ ਤੋਂ ਵੀ ਘੱਟ ਸੀ।)
ਇਹ ਕੋਈ ਗ਼ੈਰ ਵਾਜਬ ਉਲਾਂਭਾ ਨਹੀਂ ਹੋਵੇਗਾ ਕਿ ਪੰਜਾਬੀਆਂ ਨੇ ਇਤਿਹਾਸ ਸਿਰਜਿਆ ਤਾਂ ਬਥੇਰਾ ਹੈ,ਪਰ ਸਾਂਭਿਆ ਥੋੜ੍ਹਾ ਹੈ। ਇਹ ਇਤਹਾਸਕਾਰਾਂ ਦਾ ਕੰਮ ਹੈ । ਪਰ ਸਾਡਾ ਸਾਹਿਤ ਆਪਣੀ ਬੁਕੱਲ੍ਹ 'ਚ ਪੰਜਾਬ ਦੇ ਸੂਰਮੇ ਪੁੱਤਰਾਂ ਦੀਆਂ ਅਨੇਕਾਂ ਬੀਰ ਗਥਾਵਾਂ ਸਾਭੀਂ ਬੈਠਾ ਹੈ। ਹਥਲਾ ਗੀਤ ਪੰਜਾਬੀ ਮਨ੍ਹਾਂ 'ਚ ਲੋਕ-ਗੀਤ ਵਾਂਗੂੰ ਅੰਕਿਤ ਹੋ ਚੁੱਕਿਆ ਹੈ, ਇਸ 'ਚ ਸ਼ਹੀਦ ਕਰਤਾਰ ਸਿੰਘ ਸਰਾਭੇ ਹੁਣਾਂ ਦਾ ਦੇਸ-ਵਾਸੀਆਂ ਦੇ ਨਾਓਂ ਸੰਦੇਸ਼ ਹੈ:



ਹਿੰਦ ਵਾਸੀਓ ਰੱਖਣਾ ਯਾਦ ਸਾਨੂੰ

ਕਿਤੇ ਦਿਲਾਂ 'ਚੋਂ ਨਾ ਭੁਲਾ ਜਾਣਾ

ਖਾਤਰ ਵਤਨ ਦੀ ਲੱਗੇ ਹਾਂ ਚੜ੍ਹਨ ਫਾਂਸੀ

ਸਾਨੂੰ ਵੇਖਕੇ ਨਾ ਘਬਰਾ ਜਾਣਾ

ਸਾਡੀ ਮੌਤ ਨੇ ਵਤਨ ਵਾਸੀਆਂ ਦੇ

ਦਿਲੀਂ ਵਤਨ ਦਾ ਇਸ਼ਕ ਜਗਾ ਜਾਣਾ

ਹਿੰਦ ਵਾਸੀਓ ਚਮਕਣਾ ਚੰਦ ਵਾਂਗੂੰ

ਕਿਤੇ ਬੱਦਲੀ ਹੇਠ ਨਾ ਆ ਜਾਣਾ

ਕਰਕੇ ਦੇਸ਼ ਨਾਲ ਧ੍ਰੋਹ ਯਾਰੋ

ਦਾਗ਼ ਕੌਮ ਦੇ ਮੱਥੇ ਨਾ ਲਾ ਜਾਣਾ

ਮੂਲਾ ਸਿੰਘ, ਕ੍ਰਿਪਾਲ ਨਵਾਬ ਵਾਂਗੂੰ

ਅਮਰ ਸਿੰਘ ਨਾ ਕਿਤੇ ਕਹਾ ਜਾਣਾ

ਜੇਲ੍ਹਾਂ ਹੋਣ ਕਾਲਜ ਵਤਨ ਸੇਵਕਾਂ ਦੇ

ਦਾਖ਼ਲ ਹੋ ਕੇ ਡਿਗਰੀਆਂ ਪਾ ਜਾਣਾ

ਹੁੰਦੇ ਫ਼ੇਲ ਬਹੁਤੇ ਤੇ ਪਾਸ ਥੋੜੇ

ਵਤਨ ਵਾਸੀਓ ਦਿਲ ਨਾ ਢਾਅ ਜਾਣਾ

ਪਿਆਰੇ ਵੀਰਨੋ ਚੱਲੇ ਹਾਂ ਅਸੀਂ ਜਿੱਥੇ

ਇਸੇ ਰਸਤਿਓਂ ਤੁਸੀਂ ਵੀ ਆ ਜਾਣਾ

ਹਿੰਦ ਵਾਸੀਓ ਰੱਖਣਾ ਯਾਦ ਸਾਨੂੰ....







Superblog Directory
Free Blog Directory

Monday 10 November, 2008

ਇਸ਼ਕ ਤੰਦੂਰ ਹੱਡਾਂ ਦਾ ਬਾਲਣ


ਇਸ਼ਕ ਤੰਦੂਰ ਹੱਡਾਂ ਦਾ ਬਾਲਣ
ਦੋਜਕ ਨਾਲ ਤਪਾਵਾਂ
ਕੱਢ ਕਾਲਜਾ ਕਰ ਲਾਂ ਪੇੜੇ
ਇਸ਼ਕ ਪਲੇਥਣ ਲਾਵਾਂ
ਕੁੱਟ ਚੂਰੀ ਮੈਂ ਪੋਣੇ ਬੰਨ੍ਹਦੀ
ਘਿਓ ਨੈਣਾਂ ਦਾ ਪਾਵਾਂ
ਜਿਗਰੀ ਯਾਰ ਦੀਆਂ
ਬਹਿ ਕੇ ਔਸੀਆਂ ਪਾਵਾਂ
..............
ਸੁਣ ਨੀ ਮੇਲਣੇ ਨੱਚਣ ਆਲੀਏ
ਰੂਪ ਤੇਰਾ ਹੈ ਬਾਹਲਾ
ਮੱਥੇ ਤੇਰੇ ਬਿੰਦੀ ਸੋਂਹਦੀ
ਜਿਉਂ ਅਹਿਰਨ ਵਿਚ ਫ਼ਾਲਾ
ਚਿੱਟੇ ਟੂਲ ਦੀ ਕੁੜਤੀ ਸਮਾ ਲੈ
ਉੱਤੇ ਲੈ ਲਾ ਡੋਰੀਆ ਕਾਲਾ
ਹਸਦੀ ਦੇ ਫੁੱਲ ਕਿਰਦੇ
ਚੁਗਦਾ ਫਿਰੇ ਕੁਮਾਰਾ
ਰਾਤੀਂ ਕੀ ਗੁਜਰੀ
ਦੱਸ ਪਤਲੋ ਦਿਆ ਯਾਰਾ
..............
ਨੀ ਨੱਕ ਵਿਚ ਤੇਰੇ ਲੌਂਗ ਤੇ ਮਛਲੀ
ਮੱਥੇ ਚਮਕੇ ਟਿੱਕਾ
ਤੇਰੇ ਮੂਹਰੇ ਚੰਨ ਅੰਬਰਾਂ ਦਾ
ਲਗਦਾ ਫਿੱਕਾ ਫਿੱਕਾ
ਨੀਂ ਹੱਥੀਂ ਤੇਰੇ ਛਾਪਾਂ ਛੱਲੇ
ਬਾਹੀਂ ਚੂੜਾ ਛਣਕੇ
ਨੀ ਕੱਦ ਨੱਚੇਂਗੀ
ਨੱਚ ਲੈ ਪਟੋਲਾ ਬਣਕੇ
..............
ਸਾਉਣ ਮਹੀਨੇ ਲੱਗਣ ਝੜੀਆਂ
ਭਾਦੋਂ ਵਿਚ ਅੜਾਕੇ
ਤੇਲ ਬਾਝ ਨਾ ਪੱਕਣ ਗੁਲਗੁਲੇ
ਦੇਖ ਰਹੀ ਪਰਤਿਆ ਕੇ
ਹੀਰ ਨੇ ਰਾਂਝੇ ਦੇ
ਰੱਖ 'ਤੇ ਕੰਨ ਪੜਵਾ ਕੇ
..............
ਘਰ ਜਿਨ੍ਹਾਂ ਦੇ ਲਾਗੋ ਲਾਗੀ
ਖੇਤ ਜਿਨ੍ਹਾਂ ਦੇ ਨਿਆਈਆਂ
ਉੱਚੀਆਂ ਚਰ੍ਹੀਆਂ ਸੰਘਣੇ ਬਾਜਰੇ
ਖੇਡਣ ਲੁਕਣ ਮਚਾਈਆਂ
ਲੈ ਕੇ ਗੋਪੀਆਂ ਚੜ੍ਹਗੀ ਮਨੇ ਤੇ
ਚਿੜੀਆਂ ਖੂਬ ਉਡਾਈਆਂ
ਧੁਰ ਤੱਕ ਨਿਭਣਗੀਆਂ
ਨਿਆਣੀ ਉਮਰ ਦੀਆਂ ਲਾਈਆਂ
..............

Tuesday 4 November, 2008

ਬਾਰੀਂ ਬਰਸੀਂ ਖੱਟਣ ਗਿਆ ਸੀ

ਝਾਂਜਰ ਬਣ ਮਿੱਤਰਾ
ਤੈਨੂੰ ਅੱਡੀਆਂ ਕੂਚ ਕੇ ਪਾਵਾਂ
......................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦੇ ਡੋਲ

ਵਣਾਂ ਵਿੱਚ ਆਜਾ ਵੇ
ਸੁਣ ਕੇ ਮੇਰਾ ਬੋਲ
.......................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦੀ ਰੇਤੀ

ਪਾਰ ਲੰਘਾ ਦੇ ਵੇ
ਤੂੰ ਨਦੀਆਂ ਦਾ ਭੇਤੀ
........................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦੇ ਛਾਪੇ

ਦਿਲ ਨੂੰ ਟਿਕਾਣੇ ਰੱਖੀਏ
ਯਾਰ ਹੋਣਗੇ ਮਿਲਣਗੇ ਆਪੇ
.......................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦਾ ਤਾਣਾ

ਬੰਤੋ ਬਣ ਬੱਕਰੀ
ਜੱਟ ਬਣੇ ਤੂਤ ਦਾ ਟਾਹਣਾ
......................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦੇ ਰੋੜ

ਮੇਰੀ ਕੀਹਨੇ ਖਿੱਚ ਲਈ
ਪਤੰਗ ਵਾਲੀ ਡੋਰ
........................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦਾ ਪਦੀਨਾ

ਰਾਹ 'ਤੇ ਘਰ ਮੇਰਾ
ਮਿਲ ਕੇ ਜਾਈਂ ਸ਼ਕੀਨਾ
..........................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਇਆ ਟੱਲੀ

ਸਾਹਮਣੇ ਘਰ ਵਾਲਿਆ
ਮੈਂ ਅੱਜ ਮੁਕਲਾਵੇ ਚੱਲੀ
.........................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦੇ ਪਾਵੇ

ਰਾਂਝੇ ਨੂੰ ਪਿੱਛੇ ਛੱਡ ਕੇ
ਮੈਥੋਂ ਪੱਬ ਚੱਕਿਆ ਨਾ ਜਾਵੇ
.........................
ਬਾਰੀਂ ਬਰਸੀਂ ਖੱਟਣ ਗਿਆ ਸੀ
ਖੱਟ ਕੇ ਲਿਆਂਦਾ ਡੰਡਾ

ਸਾਧਣੀ ਹੋ ਜਾਊਂਗੀ
ਤੈਨੂੰ ਕਰਕੇ ਰੰਡਾ
......................

Saturday 1 November, 2008

ਮਿਹਣੇ ਦੇਣ ਸਹੇਲੀਆਂ (ਲੋਕ-ਗੀਤ)

ਉੱਚੜਾ ਬੁਰਜ਼ ਲਾਹੋਰ ਦਾ, ਵੇ ਚੀਰੇ ਵਾਲਿਆ !
ਹੇਠ ਵਗੇ ਦਰਿਆ, ਵੇ ਸੱਜਣ ਮੇਰਿਆ !

ਮਲ ਮਲ ਨ੍ਹਾਵਣ ਗੋਰੀਆਂ, ਵੇ ਚੀਰੇ ਵਾਲਿਆ !
ਲੈਣ ਰੱਬ ਦਾ ਨਾਂ, ਵੇ ਸੱਜਣ ਮੇਰਿਆ !

ਕੋਠੇ ਉੱਤੇ ਕੋਠੜੀ, ਵੇ ਚੀਰੇ ਵਾਲਿਆ !
ਕੋਠੇ 'ਤੇ ਤਸਵੀਰ, ਵੇ ਸੱਜਣ ਮੇਰਿਆ !

ਮੈਂ ਦਰਿਆ ਦੀ ਮਛਲੀ, ਵੇ ਚੀਰੇ ਵਾਲਿਆ !
ਤੂੰ ਦਰਿਆ ਦਾ ਨੀਰ, ਵੇ ਸੱਜਣ ਮੇਰਿਆ !

ਕੋਠੇ ਉੱਤੇ ਕੋਠੜੀ, ਵੇ ਚੀਰੇ ਵਾਲਿਆ !
ਧੁਰ ਕੋਠੇ 'ਤੇ 'ਵਾ, ਵੇ ਜਾਨੀ ਮੇਰਿਆ !

ਸ਼ੱਕਰ ਹੋਵੇ ਤਾਂ ਵੰਡੀਏ, ਵੇ ਕੰਠੇ ਵਾਲਿਆ !
ਰੂਪ ਨਾ ਵੰਡਿਆ ਜਾ, ਵੇ ਜਾਨੀ ਮੇਰਿਆ !

ਧਾਗਾ ਹੋਵੇ ਤਾਂ ਤੋੜੀਏ ਵੇ ਕੰਠੇ ਵਾਲਿਆ !
ਪ੍ਰੀਤ ਨਾ ਤੋੜੀ ਜਾ, ਵੇ ਜਾਨੀ ਮੇਰਿਆ !

ਢਲ 'ਗਏ ਤਰੰਗੜ ਖਿੱਤੀਆਂ, ਵੇ ਚੀਰੇ ਵਾਲਿਆ !
ਹੋ ਚੱਲੀ ਪ੍ਰਭਾਤ ਵੇ, ਵੇ ਜਾਨੀ ਮੇਰਿਆ !

ਮੈਨੂੰ ਮਿਹਣੇ ਦੇਣ ਸਹੇਲੀਆਂ,ਵੇ ਚੀਰੇ ਵਾਲਿਆ !
ਮੇਰੀ ਪਰਤ ਨਾ ਪੁੱਛੀ ਬਾਤ, ਵੇ ਜਾਨੀ ਮੇਰਿਆ !

Thursday 23 October, 2008

ਫੈਸ਼ਨਾਂ ਤੋਂ ਕੀ ਲੈਣਾ (ਲੋਕ-ਗੀਤ)




(ਇਸ ਲੋਕ-ਗੀਤ 'ਚ ਪੰਜਾਬੀ ਗਹਿਣਿਆਂ ਦੀ ਖ਼ਬਸੂਰਤ ਅੰਦਾਜ਼ 'ਚ ਚਰਚਾ ਕੀਤੀ ਗਈ ਹੈ)


ਤੇਰੀ ਗੁੱਤ 'ਤੇ ਕਚਿਹਰੀ ਲਗਦੀ,

ਦੂਰੋਂ ਦੂਰੋਂ ਆਉਣ ਝਗੜੇ।

ਸੱਗੀ-ਫੁੱਲ ਨੀ ਸ਼ਿਸ਼ਨ ਜੱਜ ਤੇਰੇ,

ਕੈਂਠਾ ਤੇਰਾ ਮੁਹਤਮ ਹੈ।

ਵਾਲੇ, ਡੰਡੀਆਂ ਕਮਿਸ਼ਨਰ ਡਿਪਟੀ,

ਨੱਤੀਆਂ ਇਹ ਨੈਬ ਬਣੀਆਂ।

ਜ਼ੈਲਦਾਰ ਨੀ ਮੁਰਕੀਆਂ ਤੇਰੀਆਂ,

ਸਫੈਦ-ਪੋਸ਼ ਬਣੇ ਗੋਖੜੂ।

ਨੱਥ, ਮਛਲੀ, ਮੇਖ਼ ਤੇ ਕੋਕਾ,

ਇਹ ਨੇ ਸਾਰੇ ਛੋਟੇ ਮਹਿਕਮੇ।

ਤੇਰਾ ਲੌਂਗ ਕਰੇ ਸਰਦਾਰੀ,

ਥਾਣੇਦਾਰੀ ਨੁੱਕਰਾ ਕਰੇ।

ਚੌਕੀਦਾਰਨੀ ਬਣੀ ਬਘਿਆੜੀ,

ਤੀਲੀ ਬਣੀ ਟਹਿਲਦਾਰਨੀ।

ਕੰਢੀ, ਹਸ ਦਾ ਪੈ ਗਿਆ ਝਗੜਾ,

ਤਵੀਤ ਉਗਾਹੀ ਜਾਣਗੇ।

ਬੁੰਦੇ ਬਣ ਗਏ ਵਕੀਲ ਵਲੈਤੀ,

ਚੌਂਕ-ਚੰਦ ਨਿਆਂ ਕਰਦੇ।

ਦਫ਼ਾ ਤਿੰਨ ਸੌ ਆਖਦੇ ਤੇਤੀ,

ਕੰਠੀ ਨੂੰ ਸਜ਼ਾ ਬੋਲ ਗਈ।

ਹਾਰ ਦੇ ਗਿਆ ਜ਼ਮਾਨਤ ਪੂਰੀ,

ਕੰਠੀ ਨੂੰ ਛੁਡਾ ਕੇ ਲੈ ਗਿਆ।

ਨਾਮ ਬਣ ਕੇ ਬੜਾ ਪਟਵਾਰੀ,

ਹਿੱਕ ਨਾਲ ਮਿਣਤੀ ਕਰੇ।

ਤੇਰਾ ਚੂੜਾ ਰਸਾਲਾ ਪੂਰਾ,

ਬਾਜੂ-ਬੰਦ ਵਿਗੜ ਗਏ।

ਪਰੀ-ਬੰਦ ਅੰਗਰੇਜ਼ੀ ਗੋਰੇ,

ਫੌਜ ਦੇ ਵਿਚਾਲੇ ਸਜਦੇ।

ਤੇਰੀ ਜੁਗਨੀ ਘੜੀ ਦਾ ਪੁਰਜਾ,

ਜ਼ੰਜ਼ੀਰੀ ਤਾਰ ਬੰਗਲੇ ਦੀ।

ਇਹ ਝਾਂਜਰਾਂ ਤਾਰ ਅੰਗਰੇਜ਼ੀ,

ਮਿੰਟਾਂ 'ਚ ਦੇਣ ਖ਼ਬਰਾਂ।

ਤੇਰੇ ਘੋੜੇ ਦੇਣ ਪਏ ਮਰੋੜੇ,

ਬਈ ਆਸ਼ਕ ਲੋਕਾਂ ਨੂੰ।

ਬਾਂਕਾਂ ਤੇਰੀਆਂ ਮਾਰਦੀਆਂ ਹਾਕਾਂ,

ਖ਼ਰਚਾਂ ਨੂੰ ਬੰਦ ਕਰਦੇ।

ਜੈਨਾਂ, ਜੈਨਾਂ ਨਿੱਤ ਦੇ ਨਸ਼ਈ ਰਹਿਣਾ,

ਨੀ ਝੂਠੇ ਫੈਸ਼ਨਾਂ ਤੋਂ ਕੀ ਲੈਣਾ?







Thursday 16 October, 2008

ਸਾਰੇ ਜੱਗ ਨੂੰ ਜੁੱਤੀ 'ਤੇ ਜਾਣਾ


ਦਾਣਾ-ਦਾਣਾ-ਦਾਣਾ

ਚਾਂਦੀ ਦਾ ਘੜਾ ਦੇ ਗੋਖੜੂ


ਮੇਰਾ ਹੋ ਗਿਆ ਹਾਰ ਪੁਰਾਣਾ

ਪੱਚੀਆਂ ਦੀ ਲੈ ਦੇ ਲੋਗੜੀ

ਪਾਉਣਾ ਗੁੱਤ ਦੇ ਵਿਚਾਲੇ ਠਾਣਾ

ਜੁੱਤੀ ਨੂੰ ਲੁਆ ਦੇ ਘੁੰਗਰੂ

ਮੇਲੇ ਹੈਦਰ ਸ਼ੇਖ ਦੇ ਜਾਣਾ

ਦਿਲ ਦੀ ਪੁਗਾਉਣੀ ਸੱਜਣਾ

ਭਾਮੇਂ ਰਹੇ ਨਾ ਭੜੋਲੀ ਵਿੱਚ ਦਾਣਾ

ਤੇਰੀਆਂ ਮੈਂ ਲੱਖ ਮੰਨੀਆਂ

ਮੇਰੀ ਇੱਕ ਜੇ ਮੰਨੇਂ ਤਾਂ ਮੈਂ ਜਾਣਾ

ਤੂੰ ਤਾਂ ਪੱਟ 'ਤੇ ਪੁਆ ਲੀਂ ਮੋਰਨੀ

ਮੈਂ ਤਾਂ ਠੋਡੀ 'ਤੇ ਖੁਣਾਉਣਾ ਚੰਦ-ਦਾਣਾ

ਇਕ ਤੇਰੀ ਜਿੰਦ ਬਦਲੇ

ਸਾਰੇ ਜੱਗ ਨੂੰ ਜੁੱਤੀ 'ਤੇ ਜਾਣਾ

.................

ਰੜਕੇ-ਰੜਕੇ-ਰੜਕੇ

ਭੀੜੀ ਗਲੀ ਵਿਚ ਹੋ ਗੇ ਟਾਕਰੇ


ਖੜ੍ਹ ਗਿਆ ਬਾਹੋਂ ਫੜ ਕੇ

ਚੁਗਲ ਖੋਰ ਨੇ ਚੁਗਲੀ ਕੀਤੀ

ਬੋਲ ਕਾਲਜੇ ਰੜਕੇ

ਭਾਈਆਂ ਮੇਰਿਆਂ ਨੂੰ ਖ਼ਬਰਾਂ ਹੋਈਆਂ

ਆ ਗੇ ਡਾਂਗਾਂ ਫ਼ੜ ਕੇ

ਅੱਖੀਆਂ ਪੂੰਝੇਗਾ

ਲੜ ਸਾਫ਼ੇ ਦਾ ਫੜ ਕੇ

.................

ਝਾਮਾਂ-ਝਾਮਾਂ-ਝਾਮਾਂ

ਕੁੜਤੀ ਲਿਆ ਦੇ ਟੂਲ ਦੀ


ਮੈਂ ਰੇਸ਼ਮੀ ਸੁੱਥਣ ਨਾਲ ਪਾਵਾਂ

ਕੰਨਾਂ ਨੂੰ ਕਰਾ ਦੇ ਡੰਡੀਆਂ

ਤੇਰਾ ਜੱਸ਼ ਗਿੱਧਿਆਂ ਵਿਚ ਗਾਵਾਂ

ਮਿਸਰੀ ਕੜੱਕ ਬੋਲਦੀ

ਲੱਡੂ ਲਿਆਮੇਂ ਤਾਂ ਭੋਰ ਕੇ ਖਾਵਾਂ

.................

Sunday 12 October, 2008

ਤੇਰੇ ਲੌਂਗ ਦਾ ਪਿਆ ਲਿਸ਼ਕਾਰਾ


ਬਾਬਲ ਮੇਰੇ ਬਾਗ ਲਵਾਇਆ

ਵਿਚ ਬਹਾਇਆ ਮਾਲੀ


ਬੂਟੇ ਬੂਟੇ ਨੂੰ ਪਾਣੀ ਦੇਵੇ

ਫ਼ਲ ਲਗਦਾ ਡਾਲੀ ਡਾਲੀ

ਰੂਪ ਕੁਆਰੀ ਦਾ

ਦਿਨ ਚੜਦੇ ਦੀ ਲਾਲੀ

...............

ਸੁਣ ਵੇ ਬਾਗ ਦਿਆ ਬਾਗ ਬਗੀਚਿਆ

ਸੁਣ ਵੇ ਬਾਗ ਦਿਆ ਮਾਲੀ


ਕਈਆਂ ਨੂੰ ਤਾਂ ਦੋ ਦੋ ਫੁੱਲ ਲੱਗੇ

ਕਈਆਂ ਦੀ ਝੋਲੀ ਖਾਲੀ

ਰੂਪ ਕੁਆਰੀ ਦਾ

ਦਿਨ ਚੜਦੇ ਦੀ ਲਾਲੀ

...............

ਆਉਣ ਜਾਣ ਨੂੰ ਬੋਤੀ ਲੈ ਲੈ

ਦੁੱਧ ਪੀਣ ਨੂੰ ਬੂਰੀ


ਆਪਣੇ ਕਿਹੜੇ ਬਾਲਕ ਰੋਂਦੇ

ਕੁੱਟ ਖਾਂਵਾਂਗੇ ਚੂਰੀ

ਜੀਹਦਾ ਲੱਕ ਪਤਲਾ

ਉਹ ਹੈ ਮਜਾਜਣ ਪੂਰੀ

...............

ਭੱਤਾ ਲੈ ਕੇ ਤੂੰ ਚੱਲੀ ਸੰਤੀਏ

ਮੱਥੇ ਲੱਗ ਗਿਆ ਤਾਰਾ


ਘੁੰਡ ਚੱਕ ਕੇ ਦੇਖਣ ਲੱਗੀ

ਕਣਕਾਂ ਲੈਣ ਹੁਲਾਰਾ

ਦਿਲ ਤਾਂ ਮੇਰਾ ਐਂ ਪਿਘਲ ਗਿਆ

ਜਿਉਂ ਬੋਤਲ 'ਚੋਂ ਪਾਰਾ

ਹਾਲੀਆਂ ਨੇ ਹਲ ਛੱਡ ਤੇ

ਤੇਰੇ ਲੌਂਗ ਦਾ ਪਿਆ ਲਿਸ਼ਕਾਰਾ

...............

ਐਧਰ ਕਣਕਾਂ ਔਧਰ ਕਣਕਾਂ

ਵਿਚ ਕਣਕਾਂ ਦੇ ਰਾਈ


ਰਾਈ ਰਾਈ ਵੇਚ ਕੇ

ਨੀਂ ਮੈਂ ਪੋਲੀ ਨੱਥ ਕਰਾਈ

ਜਦ ਮੈਂ ਪਾ ਕੇ ਲੰਘਣ ਲੱਗੀ

ਝਾਂਜਰ ਦਵੇ ਦੁਹਾਈ

ਰਸਤਾ ਛੱਡ ਦਿਉ ਵੈਰੀਓ

ਮੈਂ ਪੰਜਾਬਣ ਜੱਟੀ ਆਈ

...............

Sunday 5 October, 2008

ਤੂੰ ਘਰ ਪੱਟਤਾ ਵੇ


ਮਾਏਂ ਨੀ ਮੈਨੂੰ ਰੱਖ ਲੈ ਕੁਆਰੀ

ਕੱਤਿਆ ਕਰੂੰਗੀ ਗੋਹੜਾ


ਦਿਨ ਭਰ ਉਹ ਬਹਿੰਦਾ ਠੇਕੇ

ਕਰੇ ਨਾ ਰਾਤੀਂ ਮੋੜਾ

ਵੈਲੀ ਮਾਲਕ ਦਾ

ਲੱਗ ਗਿਆ ਹੱਡਾਂ ਨੂੰ ਝੋਰਾ

................

ਸੂਫ਼ ਦੀ ਸੁਥਣ ਨਾਲ ਸੋਂਹਦੀਆਂ ਬਾਂਕਾਂ

ਜਿਉਂ ਨੌਕਰ ਦੀ ਵਰਦੀ


ਕਦੇ ਨਾ ਬਹਿਕੇ ਗੱਲਾਂ ਕਰੀਆਂ

ਕਦੇ ਨਾ ਕੀਤੀ ਮਰਜੀ

ਤੈਂ ਮੈਂ ਫੂਕ ਸਿੱਟੀ

ਢੋਲਿਆ ਵੇ ਅਲਗਰਜੀ

................

ਲੋਹੇ ਦੇ ਕੋਹਲੂ ਤੇਲ ਮੂਤਦੇ

ਕੁਤਰਾ ਕਰਨ ਮਸ਼ੀਨਾਂ


ਤੂੜੀ ਖਾਂਦੇ ਢੱਗੇ ਹਾਰਗੇ

ਗੱਭਰੂ ਲੱਗ ਗੇ 'ਫੀਮਾਂ

ਤੂੰ ਘਰ ਪੱਟਤਾ ਵੇ

ਦਾਰੂ ਦਿਆ ਸ਼ਕੀਨਾ

................

ਧੂੜਕੋਟ ਦੇ ਕੋਲ ਹਨੇਰੀ

ਬੁਟੱਰ ਜਾ ਕੇ ਗੱਜਿਆ


ਦਾਰੂ ਪੀ ਕੇ ਗੁੱਟ ਹੋ ਗਿਆ

ਅਜੇ ਨਾ ਰੰਹਿਦਾ ਰੱਜਿਆ

ਰਾਤੀਂ ਰੋਂਦੀ ਦਾ

ਮੂੰਹ ਪਾਵੇ ਨਾਲ ਵੱਜਿਆ

................

ਪੱਠੇ ਨਾ ਪਾਉਂਨੈਂ ਦੱਥੇ ਨਾ ਪਾਉਂਨੈਂ

ਭੁੱਖੀ ਮਾਰ ਲੀ ਖੋਲੀ


ਕੱਢ ਕਾੜਨੀ ਦੁੱਧ ਦੀ ਬਹਿ ਗਿਆ

ਆਣ ਬਹਾਈ ਟੋਲੀ

ਮੈਂ ਨਾ ਕਿਸੇ ਦੇ ਭਾਂਡੇ ਮਾਂਜਣੇ

ਮੈਂ ਨਾ ਕਿਸੇ ਦੀ ਗੋਲੀ

ਬਹੁਤਾ ਸਿਰ ਚੜ ਗਿਆ

ਅਣਸਰਦੇ ਨੂੰ ਬੋਲੀ

................

Thursday 2 October, 2008

ਕੁੜੀਆਂ ਨੂੰ ਦਸੱਦੀ ਫਿਰਾਂ


ਕੀ ਮੁੰਡਿਆ ਤੂੰ ਬਣਿਆ ਫਿਰਦਾ

ਤੈਨੂੰ ਆਪਣਾ ਕੰਤ ਦਿਖਾਵਾਂ


ਵੇ ਚਿੱਟਾ ਕੁੜਤਾ ਹਰਾ ਚਾਦਰਾ

ਨਾਮੀ ਪੱਗ ਰੰਗਾਵਾਂ

ਸੋਹਣੇ ਛੈਲ ਛਬੀਲੇ ਦੇ

ਮੈਂ ਗਲ ਵਿੱਚ ਬਾਹਾਂ ਪਾਵਾਂ

ਤੇਰੇ ਵਰਗੇ ਦਾ

ਮੈਂ ਨਾ ਲਵਾਂ ਪਰਛਾਵਾਂ

.............

ਚੜ ਵੇ ਚੰਦਾ ਦੇ ਵੇ ਲਾਲੀ

ਕਿਉਂ ਪਾਇਆ ਏ ਨੇਰਾ


ਆਈ ਗੁਆਂਢਣ ਪੁੱਛਣ ਲੱਗੀ

ਉਹ ਕੀ ਲਗਦਾ ਤੇਰਾ

ਬਾਪ ਮੇਰੇ ਦਾ ਸਕਾ ਜਵਾਈ

ਸਿਰ ਮੇਰੇ ਦਾ ਸਿਹਰਾ

ਕੁੜੀਆਂ ਨੂੰ ਦਸੱਦੀ ਫਿਰਾਂ

ਅੜਬ ਪਰਾਹੁਣਾ ਮੇਰਾ

.............

ਕੁੜੀਉ ਨੀ ਮੇਰਾ ਪਰਾਹੁਣਾ ਦੇਖ ਲੋ

ਸਾਰੇ ਪਿੰਡ 'ਚੋਂ ਸਾਊ


ਨਾ ਇਹ ਕਿਸੇ ਨੂੰ ਮੱਥਾ ਟੇਕਦਾ

ਨਾ ਇਹ ਸਿਰ ਪਲਸਾਊ

ਜੇ ਮੈਂ ਨਾ ਜਾਵਾਂ

ਕਿਹਨੂੰ ਬਹੂ ਬਣਾਊ

.............

ਸੁਣ ਵੇ ਗੱਭਰੂਆ ਚੀਰੇ ਵਾਲਿਆ

ਛੈਲ ਛਬੀਲਿਆ ਸ਼ੇਰਾ


ਤੇਰੇ ਬਾਝੋਂ ਘਰ ਵਿੱਚ ਸਾਨੂੰ

ਦਿੱਸਦਾ ਘੁੱਪ ਹਨੇਰਾ

ਹੋਰ ਹਾਲੀ ਤਾਂ ਘਰਾਂ ਨੂੰ ਆਗੇ

ਤੈਂ ਵਗ ਲਿਆ ਕਿਉਂ ਘੇਰਾ

ਤੈਨੂੰ ਧੁੱਪ ਲਗਦੀ

ਭੁੱਜਦਾ ਕਾਲਜਾ ਮੇਰਾ

.............

ਹਰ ਵੇ ਬਾਬਲਾ ਹਰ ਵੇ

ਮੇਰਾ ਮਾਝੇ ਸਾਕ ਨਾ ਕਰ ਵੇ


ਮਾਝੇ ਦੇ ਜੱਟ ਬੁਰੇ ਸੁਣੀਂਦੇ

ਪਾਉਂਦੇ ਊਠ ਨੂੰ ਖਲ ਵੇ

ਖਲ ਤਾਂ ਮੈਥੋਂ ਕੁੱਟੀ ਨਾ ਜਾਂਦੀ

ਗੁੱਤੋਂ ਲੈਂਦੇ ਫੜ ਵੇ

ਮੇਰਾ ਉੱਡੇ ਡੋਰੀਆ

ਮਹਿਲਾਂ ਵਾਲੇ ਘਰ ਵੇ

.............

Friday 26 September, 2008

ਕਬਰਾਂ 'ਡੀਕਣ ਖੜੀਆਂ


ਚੱਲ ਵੇ ਮਨਾ ਬਗਾਨਿਆ ਧਨਾ

ਕੀ ਲੈਣਾ ਜੱਗ ਰਹਿ ਕੇ


ਚੰਨਣ ਦੇਹੀ ਆਪ ਗਵਾ ਲਈ

ਬਾਂਸਾਂ ਵਾਗੂੰ ਖਹਿ ਕੇ

ਧਰਮ ਰਾਜ ਅੱਗੇ ਲੇਖਾ ਮੰਗਦਾ

ਲੰਘ ਜਾਂਗੇ ਕੀ ਕਹਿ ਕੇ

ਦੁਖੜੇ ਭੋਗਾਂਗੇ

ਵਿਚ ਨਰਕਾਂ ਦੇ ਰਹਿ ਕੇ

..............

ਚੱਲ ਵੇ ਮਨਾ ਬਗਾਨਿਆ ਧਨਾ

ਕਾਹਨੂੰ ਪਰੀਤਾਂ ਜੜੀਆਂ


ਓੜਕ ਇੱਥੋਂ ਚਲਣਾ ਇੱਕ ਦਿਨ

ਕਬਰਾਂ 'ਡੀਕਣ ਖੜੀਆਂ

ਉੱਤੋਂ ਦੀ ਤੇਰੇ ਵਗਣ ਹਨੇਰੀਆਂ

ਲੱਗਣ ਸਾਉਣ ਦੀਆਂ ਝੜੀਆਂ

ਅੱਖੀਆਂ ਮੋੜ ਰਹੀ

ਨਾ ਮੁੜੀਆਂ ਨਾ ਲੜੀਆਂ

..............

ਚੱਲ ਵੇ ਮਨਾ ਬਗਾਨਿਆ ਧਨਾ

ਬੈਠਾ ਕਿਸੇ ਨਾ ਰਹਿਣਾ


ਇੱਕ ਦਿਨ ਤੈਨੂੰ ਇੱਥੋਂ ਚਲਣਾ ਪੈਣਾ

ਜਾ ਕਬਰਾਂ ਵਿੱਚ ਰਹਿਣਾ

ਤੇਰੇ ਉੱਤੋਂ ਦੀ ਵਗਣ ਹਨੇਰੀਆਂ

ਮੰਨ ਫ਼ੱਕਰਾਂ ਦਾ ਕਹਿਣਾ

ਬਾਗ਼ 'ਚ ਫ਼ੁੱਲ ਖਿੜਿਆ

ਅਸੀਂ ਭੌਰੇ ਬਣ ਕੇ ਰਹਿਣਾ

..............

ਲੰਮਿਆ ਵੇ ਤੇਰੀ ਕਬ਼ਰ ਪਟੀਂਦੀ

ਮਧਰਿਆ ਵੇ ਤੇਰਾ ਖਾਤਾ


ਭਰ ਭਰ ਚੇਪੇ ਹਿੱਕ ਤੇ ਰੱਖਦਾ

ਹਿੱਕ ਦਾ ਪਵੇ ਜੜਾਕਾ

ਸੋਹਣੀ ਸੂਰਤ ਦਾ

ਵਿਚ ਕਬਰਾਂ ਦੇ ਵਾਸਾ

..............

ਮਰ ਗਏ ਵੀਰ ਰੋਂਦੀਆਂ ਭੈਣਾਂ

ਵਿਛੜੀ ਵਿਸਾਖੀ ਭਰ ਗਿਆ ਸ਼ਹਿਣਾ


ਛਿਪ ਜਾਊ ਕੁਲ ਦੁਨੀਆਂ

ਏਥੇ ਨਾਮ ਸਾਈਂ ਦਾ ਰਹਿਣਾ

ਸੋਹਣੀ ਜਿੰਦੜੀ ਨੇ

ਰਾਹ ਮੌਤਾਂ ਦੇ ਪੈਣਾ


ਜਾਂ


ਕੀ ਬੰਨਣੇ ਨੇ ਦਾਅਵੇ

ਏਥੋਂ ਚੱਲਣਾ ਸਭਨੂੰ ਪੈਣਾ

..............

Monday 22 September, 2008

ਬਦੀਆਂ ਨਾ ਕਰ ਵੇ


ਪਤਲਾ ਜਾ ਗੱਭਰੂ ਵਢਦਾ ਬੇਰੀਆਂ

ਵੱਢ ਵੱਢ ਲਾਉਂਦਾ ਝਾਫੇ


ਹਾਕ ਨਾ ਮਾਰੀਂ ਵੇ

ਮੇਰੇ ਸੁਨਣਗੇ ਮਾਪੇ

ਸੈਨਤ ਨਾ ਮਾਰੀਂ

ਮੈਂ ਆ ਜੂੰਗੀ ਆਪੇ

ਫੁੱਟਗੇ ਵੇ ਮਿੱਤਰਾ

ਜੇਬਾਂ ਬਾਝ ਪਤਾਸੇ

..............

ਮੈਂ ਤਾਂ ਘਰ ਤੋਂ ਸਾਗ ਲੈਣ ਦਾ

ਕਰਕੇ ਤੁਰੀ ਬਹਾਨਾ


ਜਾਣ ਵੀ ਦੇਹ ਕਿਉਂ ਵੀਣੀ ਫੜ ਕੇ

ਖੜ ਗਿਐ ਛੈਲ ਜੁਆਨਾ

ਕੱਚੀਆਂ ਕੈਲਾਂ ਦਾ

ਕੌਣ ਭਰੂ ਹਰਜਾਨਾ

..............

ਹਰਾ ਮੂੰਗੀਆ ਬੰਨ ਕੇ ਸਾਫਾ

ਬਣਿਆ ਫਿਰਦਾ ਜਾਨੀ


ਭਾੜੇ ਦੀ ਹੱਟ ਵਿਚ ਰਹਿ ਕੇ ਬੰਦਿਆ

ਮੌਜ ਬਥੇਰੀ ਮਾਣੀ

ਕਾਲਿਆਂ ਦੇ ਵਿਚ ਆ ਗਏ ਧੌਲੇ

ਆ ਗਈ ਮੌਤ ਨਿਸ਼ਾਨੀ

ਬਦੀਆਂ ਨਾ ਕਰ ਵੇ

ਕੋਈ ਦਿਨ ਦੀ ਜਿੰਦਗਾਨੀ

..............

ਗਿੱਧਾ ਗਿੱਧਾ ਕਰੇਂ ਮੇਲਣੇ

ਗਿੱਧਾ ਪਊ ਬਥੇਰਾ


ਸਾਰੇ ਪਿੰਡ ਦੇ ਮੁੰਡੇ ਸਦਾ ਲੇ

ਕੀ ਬੁਢੜਾ ਕੀ ਠੇਰਾ

ਅੱਖ ਪੱਟ ਕੇ ਦੇਖ ਮੇਲਣੇ

ਭਰਿਆ ਪਿਆ ਨਮੇਰਾ

ਸਬਜ਼ ਕਬੂਤਰੀਏ

ਦੇ ਦੇ ਸ਼ੌਂਕ ਦਾ ਗੇੜਾ

..............

ਗਿੱਧਾ ਗਿੱਧਾ ਕਰੇਂ ਰਕਾਨੇ

ਗਿੱਧਾ ਪਊ ਬਥੇਰਾ


ਪਿੰਡ ਦੇ ਮੁੰਡੇ ਦੇਖਣ ਆ ਗੇ

ਕੀ ਬੁੱਢਾ, ਕੀ ਠੇਰਾ

ਬੰਨ ਕੇ ਢਾਣੀਆਂ ਆ ਗੇ ਚੋਬਰ

ਢੁੱਕਿਆ ਸਾਧ ਦਾ ਡੇਰਾ

ਅੱਖ ਚੱਕ ਕੇ ਤਾਂ ਕੇਰਾਂ

ਝੁਕਿਆ ਪਿਆ ਨਮੇਰਾ

ਤੈਨੂੰ ਧੁੱਪ ਲੱਗਦੀ

ਮੱਚੇ ਕਾਲਜਾ ਮੇਰਾ


ਜਾਂ


ਖੁੱਲ ਕੇ ਨੱਚ ਲੈ ਨੀ

ਸਾਲ ਬਾਅਦ ਦਾ ਫੇਰਾ

..............

Saturday 13 September, 2008

ਵਿਆਂਦੜ ਫੁੱਲ ਵਰਗਾ


ਸੋਹਣਾ ਵਿਆਂਦੜ ਰਥ ਵਿਚ ਬਹਿ ਗਿਆ

ਹੇਠ ਚੁਤੱਹੀ ਵਿਛਾ ਕੇ

ਊਠਾਂ ਤੇ ਸਭ ਜਾਨੀ ਚੜ ਗਏ

ਝਾਂਜਰਾਂ ਛੋਟੀਆਂ ਪਾ ਕੇ

ਰਥ ਗੱਡੀਆਂ ਜਾ ਅੰਤ ਨਾ ਕੋਈ

ਜਾਨੀ ਚੜ ਗਏ ਸਜ ਸਜਾ ਕੇ

ਜੰਨ ਆਈ ਜਦ ਕੁੜੀਆਂ ਦੇਖੀ

ਆਈਆਂ ਹੁੰਮ ਹੁੰਮਾ ਕੇ

ਵਿਆਂਦੜ ਫੁੱਲ ਵਰਗਾ

ਦੇਖ ਵਿਆਹੁਲੀਏ ਆ ਕੇ

...............................

ਪਹਿਲੀ ਵਾਰ ਬਹੂ ਗਈ ਮੁਕਲਾਵੇ

ਗੱਲ ਪੁੱਛ ਲੈਂਦਾ ਸਾਰੀ

ਕੀਹਦੇ ਨਾਲ ਤੇਰੀ ਲੱਗੀ ਦੋਸਤੀ

ਕੀਹਦੇ ਨਾਲ ਤੇਰੀ ਯਾਰੀ

ਨਾ ਵੇ ਕਿਸੇ ਨਾਲ ਲੱਗੀ ਦੋਸਤੀ

ਨਾ ਵੇ ਕਿਸੇ ਨਾਲ ਯਾਰੀ

ਪੇਕੇ ਰੰਹਿਦੇ ਸੀ

ਕਰਦੇ ਸੀ ਸਰਦਾਰੀ

...............................

ਸੜਕੇ ਸੜਕੇ ਮੈਂ ਰੋਟੀ ਲਈ ਜਾਂਦੀ

ਲੱਭ ਗਈ ਸੁਰਮੇਦਾਣੀ

ਘਰ ਆ ਕੇ ਮੈਂ ਪਾਉਣ ਲੱਗੀ

ਮੱਚਦੀ ਫਿਰੇ ਜਿਠਾਣੀ

ਮਿੰਨਤਾਂ ਨਾ ਕਰ ਵੇ

ਮੈਂ ਰੋਟੀ ਨਹੀਂ ਖਾਣੀ

...............................

ਜਦ ਮੈਂ ਕੀਤੀ ਬੀ. ਏ. ਬੀ. ਐਡ

ਲੋਕੀਂ ਦੇਣ ਵਧਾਈ

ਹਾਣੀ ਮੇਰਾ ਫੇਲ਼ ਹੋ ਗਿਆ

ਮੈਨੂੰ ਹੀਣਤ ਆਈ

ਤਿੰਨ ਵਾਰੀ ਉਹ ਰਿਹਾ ਵਿਚਾਲੇ

ਡਿਗਰੀ ਹੱਥ ਨਾ ਆਈ

ਮੇਰੇ ਮਾਪਿਆਂ ਨੇ

ਬੀ. ਏ. ਫੇਰ ਕਰਾਈ

...............................

ਜੇ ਮੁੰਡਿਆ ਤੂੰ ਫੌਰਨ ਜਾਣਾ

ਜਾਈਂ ਸਾਡੇ ਨਾਲ ਲੜਕੇ

ਨਾ ਵੇ ਅਸੀਂ ਤੈਨੂੰ ਯਾਦ ਕਰਾਂਗੇ

ਨਾ ਰੋਈਏ ਮਨ ਭਰਕੇ

ਉੱਠ ਪਰਦੇਸ ਗਿਆ

ਮਨ ਸਾਡੇ ਵਿਚ ਵਸ ਕੇ

...............................

Monday 8 September, 2008

ਭੁੱਲੀਆਂ - ਵਿੱਸਰੀਆਂ



ਉਹ ਜੰਞਾ ਕਿੱਥੇ ? ਉਹ ਵਿਹਲ , ਉਹ ਖੁਲ੍ਹ, ਉਹ ਚਾਅ,

ਉਹ ਘੋੜੀਆਂ , ਉਹ ਸੁਹਾਗ,

ਉਹ ਗਿੱਧੇ , ਉਹ ਧੂੜਾਂ ਦਾ ਉਠਾਉਣਾ ਰਲ ਮਿਲ,

ਉਪਰ ਚੰਨ, ਹੇਠ ਚੰਨੀਆਂ , ਬੰਨੇ ਤੇ ਬੰਨੀਆਂ,

ਨੱਚ ਨੱਚ , ਧੱਮ ਧੱਮ ,ਥੰਮ ਥੰਮ , ਆਖਰ ਮਾਨਣ ਮੁੜ ਉਹੋ !

ਖਿਚ- ਖਿਲੀਆਂ ਪੁਰਾਣੀਆਂ !


           - ਪੂਰਨ ਸਿੰਘ

Saturday 30 August, 2008

ਲੋਕੀਂ ਸਾਨੂੰ ਛੜੇ ਆਖਦੇ


ਕੋਈ ਡਰਦੀ ਪੀਹਣ ਨਾ ਜਾਵੇ

ਛੜਿਆਂ ਦੇ ਦੋ ਚੱਕੀਆਂ

..............................

ਚੁਲ਼ੇ ਅੱਗ ਨਾ ਘੜੇ ਵਿਚ ਪਾਣੀ

ਛੜਿਆਂ ਨੂੰ ਵਖ਼ਤ ਪਿਆ

..............................

ਐਵੇਂ ਭਰਮ ਰੰਨਾਂ ਨੂੰ ਮਾਰੇ

ਹਲਕੇ ਨਾ ਛੜੇ ਫਿਰਦੇ

..............................

ਛੜੇ ਪੈਣਗੇ ਮੱਕੀ ਦੀ ਰਾਖੀ

ਰੰਨਾ ਵਾਲੇ ਘਰ ਪੈਣਗੇ

..............................

ਮੇਰੀ ਚੱਪਣੀ ਵਗਾਹ ਕੇ ਮਾਰੀ

ਛੜਿਆਂ ਦੇ ਅੱਗ ਨੂੰ ਗਈ

..............................

ਅਸੀਂ ਰੱਬ ਦੇ ਪਰਾਹੁਣੇ ਆਏ

ਲੋਕੀਂ ਸਾਨੂੰ ਛੜੇ ਆਖਦੇ

..............................

ਜਾਵੇਂਗਾ ਜਹਾਨੋਂ ਖਾਲੀ

ਵੇ ਛੜਿਆ ਦੋਜਕੀਆ

..............................

ਕਾਹਨੂੰ ਦੇਨੀਏਂ ਕੁਪੱਤੀਏ ਗਾਲਾਂ

ਛੜੇ ਦਾ ਕਿਹੜਾ ਪੁੱਤ ਮਰਜੂ

..............................

ਛਿੱਟਾ ਦੇ ਗਈ ਝਾਂਜਰਾਂ ਵਾਰੀ

ਛੜਿਆਂ ਦਾ ਦੁੱਧ ਓੱਬਲੇ

..............................

ਕਿੱਥੇ ਲਿਖਿਆ ਫ਼ਰੰਗੀਆ ਦੱਸ ਦੇ

ਰੰਨਾਂ ਵਾਲੇ ਜੰਗ ਜਿਤਦੇ

..............................

ਜਿੱਤ ਹੋਜੂ ਵੇ ਫ਼ਰੰਗਆ ਤੇਰੀ

ਛੜਿਆਂ ਨੂੰ ਲੈ ਜਾ ਲਾਮ 'ਤੇ

..............................

Tuesday 12 August, 2008

ਤੀਵੀਆਂ ਦਾ ਰਾਜ


ਚੱਕੀ ਛੁੱਟ ਗਈ ਚੁੱਲ਼ੇ ਨੇ ਛੁੱਟ ਜਾਣਾ

ਤੀਵੀਆਂ ਦਾ ਰਾਜ ਆ ਗਿਆ

.............................

ਜਿੱਥੇ ਚੱਲੇਂਗਾ ਚੱਲੂਂਗੀ ਨਾਲ ਤੇਰੇ

ਟਿਕਟਾਂ ਦੋ ਲੈ ਲਵੀਂ

.............................

ਤੇਰੇ ਨਾਲ ਨਾ ਤਲੰਗਿਆ ਜਾਣਾ

ਛੱਡ ਜਾਏਂ ਟੇਸ਼ਣ ਤੇ

.............................

ਇੱਥੋਂ ਜਾਈਂ ਨਾ ਪਰਾਹੁਣਿਆ ਖਾਲੀ

ਗੱਡੀ ਵਿੱਚ ਇੱਟ ਰੱਖ ਲੈ

.............................

ਮੇਰੀ ਖ਼ਬਰ ਲੈਣ ਨਾ ਆਇਆ

ਡਿੱਗ ਪਈ ਹਰਮਲ ਤੋਂ

.............................

ਲੌਂਗ ਤੇਰੀਆਂ ਮੁੱਛਾਂ ਵਿੱਚ ਰੁਲਿਆ

ਤਿੰਨ ਦਿਨ ਟੋਲਦੀ ਰਹੀ

.............................

ਤੇਰੇ ਝਾਂਜਰਾਂ ਵੱਜਣ ਨੂੰ ਪਾਈਆਂ

ਲੰਘ ਗਈ ਤੂੰ ਪੈਰ ਦੱਬ ਕੇ

.............................

ਮੇਰੀ ਗੁੱਤ ਦੇ ਵਿਚਾਲੇ ਠਾਣਾ

ਕੈਦ ਕਰਾ ਦੂੰਗੀ

.............................

ਕਿੱਥੇ ਚੱਲਿਐਂ ਬੂਬਨਿਆਂ ਸਾਧਾ

ਛੇੜ ਕੇ ਭਰਿੰਡ ਰੰਗੀਆਂ

.............................

ਮੇਰੀ ਜੁੱਤੀ ਨੂੰ ਲੁਆ ਦੇ ਘੁੰਗਰੂ

ਜੇ ਤੈਂ ਮੇਰੀ ਚਾਲ ਵੇਖਣੀ

.............................

ਚੱਲ ਚੱਲੀਏ ਜਰਗ ਦੇ ਮੇਲੇ

ਮੁੰਡਾ ਤੇਰਾ ਮੈਂ ਚੱਕ ਲਊਂ

.............................

ਗੋਰਾ ਰੰਗ ਡੱਬੀਆਂ ਵਿੱਚ ਆਇਆ

ਕਾਲਿਆਂ ਨੂੰ ਖ਼ਬਰ ਕਰੋ

.............................

ਮੈਂ ਮੂੰਗਰੇ ਤੜਕ ਕੇ ਲਿਆਈ

ਰੋਟੀ ਖਾਲੈ ਕੋਹੜੀ ਟੱਬਰਾ

.............................

Monday 11 August, 2008

ਹੁਣ ਨਾ ਪੁੱਛੀਦੀਆਂ ਜਾਤਾਂ


ਕਿਹੜੀ ਬੇਰੀ ਨੂੰ ਕੱਚੇ ਬੇਰ ਲਗਦੇ

ਕਿਹੜੀ ਨੂੰ ਲਗਦੇ ਗੜੌਂਦੇ

ਪੁੱਛੋ ਛੜਿਆਂ ਨੂੰ

ਸਾਰੀ ਰਾਤ ਨੀ ਸੋਂਦੇ

..............................

ਓੱਚਾ ਬੁਰਜ ਬਰੋਬਰ ਮੋਰੀ

ਦੀਵਾ ਕਿਸ ਬਿਧ ਧਰੀਏ

ਚਾਰੇ ਨੈਣ ਕਟਾਵਢ ਹੋ ਗੇ'

ਹਾਮੀ ਕੀਹਦੀ ਭਰੀਏ

ਨਾਰ ਪਰਾਈ ਆਦਰ ਥੋੜਾ

ਗਲ਼ ਲੱਗ ਕੇ ਨਾ ਮਰੀਏ

ਨਾਰ ਬਗਾਨੀ ਦੀ

ਬਾਂਹ ਨਾ ਮੂਰਖ਼ਾ ਫੜੀਏ

..............................

ਚਾੜ ਸ਼ਕੀਨੀ ਮਾਰਕੇ ਗੇੜੇ

ਰੋਟੀ ਘਰੇ ਆ ਖਾਂਦੇ

ਅੱਖੀਂ ਤਾਂ ਭਾਈ ਗੱਲਾਂ ਦੇਖੀਆਂ

ਦੁੱਖ ਤਾਂ ਦੱਸੇ ਨੀ ਜਾਂਦੇ

ਨਿਆਣੀ ਉਮਰੀਂ ਪੈ ਗੇ ਦਾਬੇ

ਫ਼ਿਕਰ ਹੱਡਾਂ ਨੂੰ ਖਾਂਦੇ

ਮੂਹਰੇ ਨਾਰਾਂ ਦੇ

ਕੰਥ ਮਾਂਜਦੇ ਭਾਂਡੇ

..............................

ਘਰ ਆਏ ਨੂੰ ਬਾਪੂ ਘੂਰਦਾ

ਖੇਤ ਗਏ ਨੂੰ ਤਾਇਆ

ਬੜੇ ਜੇਠ ਦੀ ਠਾਣੇਦਾਰੀ

ਇਹ ਸੀਰੀ ਨਾਲ ਲਾਇਆ

ਨਾ ਐਬੀ ਨਾ ਬੈਲੀ ਆ ਉਹ

ਬੋਲੇ ਮਸਾਂ ਬੁਲਾਇਆ

ਮਿੱਟੀ ਦੇ ਮਟਨ ਜਿਹੇ ਨੂੰ

ਮੇਰੇ ਪੱਲੇ ਪਾਇਆ

ਸੀਲ਼ ਢੱਗੇ ਜਿਹਾ ਸਿੱਧਰਾ ਮੂਰ਼ਾ

ਸਮਝੇ ਨਾ ਸਮਝਾਇਆ

ਰਾਤੀਂ ਰੋਂਦਾ ਸੀ

ਮਿੰਨਤਾਂ ਨਾਲ ਵਰਾਇਆ

..............................

ਤਿੰਨ ਦਿਨਾਂ ਦੀ ਤਿੰਨ ਪਾ ਮੱਖਣੀ

ਖਾ ਗਿਆ ਟੁੱਕ ਤੇ ਧਰਕੇ

ਲੋਕੀਂ ਕੰਹਿਦੇ ਮਾੜਾ ਮਾੜਾ

ਮੈਂ ਦੇਖਿਆ ਸੀ ਮਰਕੇ

ਫੁੱਲ ਵੇ ਗੁਲ਼ਾਬ ਦਿਆ

ਆ ਜਾ ਨਦੀ ਵਿੱਚ ਤਰਕੇ

..............................

ਬੋਲੀ ਪਾਵਾਂ ਸ਼ਗਨ ਮਨਾਵਾਂ

ਚਿੱਠੀ ਆਈ ਕਨੇਡਾ ਤੋਂ

ਮੈਂ ਫੜ ਕੱਤਣੀ ਵਿੱਚ ਪਾਮਾਂ

ਚਿੱਠੀਏ ! ਫੇਰ ਬਾਚੂੰ

ਮੈਂ ਰੋਟੀ ਖੇਤ ਅਪੜਾਮਾਂ

ਜੰਡੀ ਆਲ਼ਾ ਖੇਤ ਭੁੱਲਗੀ

ਮੈਂ ਰੋਂਦੀ ਘਰ ਨੂੰ ਆਮਾਂ

ਆਉਂਦੀ ਜਾਂਦੀ ਨੂੰ ਦਿਨ ਢਲ਼ ਜਾਂਦਾ

ਮੁੜ ਆਂਉਂਦਾ ਪੜਛਾਮਾਂ

ਕੋਇਲਾਂ ਬੋਲਦੀਆਂ

ਬੋਲ ਚੰਦਰਿਆ ਕਾਮਾਂ

...............................

ਪਹਿਲੀ ਵਾਰ ਜਦ ਗਈ ਮੈਂ ਸਹੁਰੇ

ਬਣ ਗਈ ਸਭ ਤੋਂ ਨਿਮਾਣੀ

ਚੁੱਲ਼ਾ ਚੌਂਕਾ ਸਾਰਾ ਸਾਂਭਦੀ

ਨਾਲੇ ਭਰਦੀ ਪਾਣੀ

ਦਿਨ ਚੜ ਜਾਵੇ ਜਾਗ ਨਾ ਆਵੇ

ਮਾਰੇ ਬੋਲ਼ ਜਠਾਣੀ

ਉੱਠ ਕੇ ਕੰਮ ਕਰ ਨੀ

ਕਾਹਤੋਂ ਪਈ ਆ ਮੂੰਗੀਆ ਤਾਣੀ

...............................

ਗ਼ਮ ਨੇ ਖਾ ਲੀ ਗ਼ਮ ਨੇ ਪੀ ਲੀ

ਗ਼ਮ ਦੀ ਕਰੋ ਨਿਹਾਰੀ

ਗ਼ਮ ਹੱਡਾਂ ਨੂੰ ਐਂ ਖਾ ਜਾਂਦਾ

ਜਿਉਂ ਲੱਕੜ ਨੂੰ ਆਰੀ

ਕੋਠੇ ਚੜ ਕੇ ਦੇਖਣ ਲੱਗੀ

ਲੈਂਦੇ ਜਾਣ ਵਪਾਰੀ

ਉੱਤਰਨ ਲੱਗੀ ਦੇ ਲੱਗਿਆ ਕੰਡਾ

ਦੁੱਖ ਹੋ ਜਾਂਦੇ ਭਾਰੀ

ਗੱਭਣਾਂ ਤੀਮੀਆਂ ਨੱਚਣੋ ਰਹਿਗੀਆਂ

ਆਈ ਫ਼ੰਡਰਾਂ ਦੀ ਬਾਰੀ

ਨਰਮ ਸਰੀਰਾਂ ਨੂੰ

ਪੈ ਗੇ ਮਾਮਲੇ ਭਾਰੀ

...............................

ਹੀਰ ਨੇ ਸੱਦੀਆਂ ਸੱਭੇ ਸਹੇਲੀਆਂ

ਸਭ ਦੀਆਂ ਨਵੀਆਂ ਪੁਸ਼ਾਕਾਂ

ਗਹਿਣੇ ਗੱਟੇ ਸਭ ਦੇ ਸੋਂਹਦੇ

ਮੈਂ ਹੀਰ ਗੋਰੀ ਵੱਲ ਝਾਕਾਂ

ਕੰਨੀ ਹੀਰ ਦੇ ਸਜਣ ਕੋਕਰੂ

ਪੈਰਾਂ ਦੇ ਵਿਚ ਬਾਂਕਾਂ

ਗਿੱਧੇ ਦੀਏ ਪਰੀਏ ਨੀ

ਤੇਰੇ ਰੂਪ ਨੇ ਪਾਈਆਂ ਧਾਂਕਾਂ

................................

ਬਾਰੀਂ ਬਰਸੀਂ ਖਟਣ ਗਿਆ ਸੀ

ਖਟ ਕੇ ਲਿਆਂਦੀਆਂ ਦਾਤਾਂ

ਲੱਗੀਆਂ ਦੋਸਤੀਆਂ

ਹੁਣ ਨਾ ਪੁੱਛੀਦੀਆਂ ਜਾਤਾਂ

................................

Friday 8 August, 2008

ਜਿੰਦ ਰਾਂਝਣ ਨਾਂ ਕਰਨੀ


ਬਹਿ ਦਰਵਾਜੇ ਪੌਣ ਮੈਂ ਲੈਂਦੀ

ਜਦ ਆਵੇ ਮੈਨੂੰ ਗਰਮੀ

ਉੱਚਾ ਬੋਲ ਮੈਂ ਕਦੇ ਨਾ ਬੋਲਾਂ

ਵੇਖ ਲੈ ਮੇਰੀ ਨਰਮੀ

ਤਖ਼ਤ ਹਜ਼ਾਰੇ ਤੂੰ ਜੰਮਿਆ ਰਾਂਝਣਾ

ਮੈਂ ਸਿਆਲਾਂ ਦੇ ਜਰਮੀ

ਸੱਦ ਪਟਵਾਰੀ ਨੂੰ

ਜਿੰਦ ਰਾਂਝਣ ਦੇ ਨਾਂ ਕਰਨੀ

...........................

ਤੂੰ ਹਸਦੀ ਦਿਲ ਰਾਜੀ ਮੇਰਾ

ਲਗਦੇ ਬੋਲ ਪਿਆਰੇ

ਚਲ ਕਿਧਰੇ ਦੋ ਗੱਲਾਂ ਕਰੀਏ

ਬਹਿ ਕੇ ਨਦੀ ਕਿਨਾਰੇ

ਲੁਕ ਲੁਕ ਲਾਈਆਂ ਪਰਗਟ ਹੋਈਆਂ

ਬੱਜ ਗਏ ਢੋਲ ਨਗਾਰੇ

ਸੋਹਣੀਏ ਆ ਜਾ ਨੀ

ਡੁੱਬਦਿਆਂ ਨੂੰ ਰੱਬ ਤਾਰੇ

...........................

ਸਹੁਰੇ ਸਹੁਰੇ ਨਾ ਕਰਿਆ ਕਰ ਨੀ

ਕੀ ਲੈਣਾ ਸਹੁਰੇ ਜਾ ਕੇ

ਪਹਿਲਾਂ ਤਾਂ ਦਿੰਦੇ ਖੰਡ ਦੀ ਚਾਹ

ਫੇਰ ਦਿੰਦੇ ਗੁੜ ਪਾ ਕੇ

ਨੀ ਰੰਗ ਬਦਲ ਗਿਆ

ਦੋ ਦਿਨ ਸਹੁਰੇ ਜਾ ਕੇ

...........................

ਮੰਹਿਦੀ ਮੰਹਿਦੀ ਸਭ ਜੱਗ ਕੰਹਿਦਾ

ਮੰਹਿਦੀ ਬਾਗ 'ਚ ਰੰਹਿਦੀ

ਬਾਗਾਂ ਦੇ ਵਿਚ ਸਸਤੀ ਮਿਲਦੀ

ਹੱਟੀਆਂ ਤੇ ਮੰਹਿਗੀ

ਹੇਠਾਂ ਕੂੰਡੀ ਉੱਤੇ ਸੋਟਾ

ਚੋਟ ਦੋਹਾਂ ਦੀ ਸੰਹਿਦੀ

ਘੋਟ ਘੋਟ ਕੇ ਹੱਥਾਂ ਨੂੰ ਲਾਈ

ਫੋਲਕ ਹੋ ਹੋ ਲੰਹਿਦੀ

ਬੋਲ ਸ਼ਰੀਕਾਂ ਦੇ

ਮੈਂ ਨਾ ਬਾਬਲਾ ਸੰਹਿਦੀ

...........................

ਮਾਹੀ ਮੇਰੇ ਦਾ ਪੱਕਿਆ ਬਾਜਰਾ

ਤੁਰ ਪਈ ਗੋਪੀਆਂ ਫੜ ਕੇ

ਖੇਤ ਜਾ ਕੇ ਹੂਕਰ ਮਾਰੀ

ਸਿਖਰ ਮਨੇ ਤੇ ਚੜ ਕੇ

ਉੱਤਰਦੀ ਨੂੰ ਆਈਆਂ ਝਰੀਟਾਂ

ਚੁੰਨੀ ਪਾਟ ਗਈ ਅੜ ਕੇ

ਤੁਰ ਪਰਦੇਸ ਗਿਉਂ

ਦਿਲ ਮੇਰੇ ਵਿਚ ਵੜ ਕੇ

...........................

ਸੁਣ ਨੀ ਕੁੜੀਏ ਮਛਲੀ ਵਾਲੀਏ

ਮਛਲੀ ਨਾ ਚਮਕਾਈਏ

ਖੂਹ ਟੋਭੇ ਤੇਰੀ ਹੁੰਦੀ ਚਰਚਾ

ਚਰਚਾ ਨਾ ਕਰਵਾਈਏ

ਪਿੰਡ ਦੇ ਮੁੰਡਿਆਂ ਤੋਂ

ਨੀਮੀਂ ਪਾ ਨੰਘ ਜਾਈਏ

...........................

ਆਰੀ ਆਰੀ ਆਰੀ

ਵਿਚ ਦਰਬਾਜੇ ਦੇ

ਫੁੱਲ ਕੱਢਦਾ ਫੁਲਕਾਰੀ

ਟੁੱਟਗੀ ਤੜੱਕ ਕਰਕੇ

ਕੀ ਅੱਲੜਾਂ ਦੀ ਯਾਰੀ

ਛੱਡ ਕੇ ਭੱਜ ਚੱਲਿਆ

ਫਿੱਟ ਕੱਚਿਆ ਵੇ ਤੇਰੀ ਯਾਰੀ

ਹਾਕਾਂ ਘਰ ਵੱਜੀਆਂ

ਛੱਡ ਮਿੱਤਰਾ ਫੁੱਲਕਾਰੀ

...........................

ਕੋਰੀ ਕੋਰੀ ਕੂੰਡੀ ਵਿੱਚ

ਮਿਰਚਾਂ ਮੈਂ ਰਗੜਾਂ

ਸਹੁਰੇ ਦੀ ਅੱਖ ਵਿੱਚ ਪਾ ਦਿੰਨੀਆਂ

ਘੁੰਡ ਕੱਢਣ ਦੀ ਅਲਖ ਮੁਕਾ ਦਿੰਨੀਆਂ

...........................

ਜੇ ਮੁੰਡਿਆ ਮੈੰਨੂ ਨੱਚਦੀ ਵੇਖਣਾ

ਬਾਂਕਾਂ ਲਿਆ ਦੋ ਭੈਣ ਦੀਆਂ

ਅੱਡੀ ਵੱਜੇ ਤੇ ਧਮਕਾਂ ਪੈਣਗੀਆਂ

...........................

ਬਾਰੀਂ ਬਰਸੀਂ ਖੱਟਣ ਗਿਆ ਸੀ

ਖੱਟ ਕੇ ਲਿਆਇਆ ਪੱਖੀਆਂ

ਘੁੰਡ ਵਿੱਚ ਕੈਦ ਕੀਤੀਆਂ

ਗੋਰਾ ਰੰਗ ਤੇ ਸ਼ਰਬਤੀ ਅੱਖੀਆਂ

...........................

Thursday 7 August, 2008

ਖੁੱਲ਼ ਕੇ ਨੱਚ ਲੈ ਨੀ


ਨਿੱਕੀ ਨਿੱਕੀ ਕਣੀ ਦਾ ਮੀਂਹ ਵਰਸੇਂਦਾ

ਭਿੱਜ ਗਿਆ ਗੈਬੀ ਤੋਤਾ

ਮੇਲਣ ਐਂ ਨੱਚਦੀ

ਜਿਉਂ ਟੱਪਦਾ ਸੜਕ ਤੇ ਬੋਤਾ

ਖੁੱਲ਼ ਕੇ ਨੱਚ ਲੈ ਨੀ

ਹਾਣੋਂ ਹਾਣ ਖਲੋਤਾ

.......................

ਨੱਚਣ ਦੀ ਤੈਨੂੰ ਜਾਚ ਨਾ ਕਾਈ

ਥੋਥੀ ਟੱਪ ਟਪਾਈ

ਭਰ ਵਲਟੋਹੀ ਖਾ ਗਈ ਖੀਰ ਦੀ

ਮੰਡਿਆਂ ਦੀ ਥਹੀ ਮੁਕਾਈ

ਤੇਰੇ ਗਹਿਣਿਆਂ ਨੇ

ਐਂਵੇਂ ਛਹਿਬਰ ਲਾਈ

.......................

ਪਹਿਨ ਪਚਰ ਕੇ ਚੜੀ ਪੀਂਘ ਤੇ

ਡਿੱਗੀ ਹੁਲਾਰਾ ਖਾ ਕਾ

ਯਾਰਾਂ ਇਹਦਿਆਂ ਨੂੰ ਖ਼ਬਰਾਂ ਹੋਈਆਂ

ਬਹਿਗੇ ਢੇਰੀਆਂ ਢਾਹ ਕੇ

ਟੁੱਟਗੀ ਯਾਰੀ ਤੋਂ

ਹੁਣ ਨੰਘਦੀ ਅੱਖ ਬਚਾ ਕੇ

ਲੱਗੀਆਂ ਸਿਆਲ ਦੀਆਂ

ਟੁਟੀਆਂ ਪਿੜਾਂ ਵਿਚ ਆ ਕੇ

.......................

ਐਧਰ ਕਣਕਾਂ ਔਧਰ ਕਣਕਾਂ

ਗੱਭੇ ਖੜਾ ਗੁਆਰਾ

ਵਿਚ ਗੁਆਰੇ ਬੋਤੀ ਚਰਦੀ

ਗਲ਼ ਵਿਚ ਉਹਦੇ ਮਾਲ਼ਾ

ਚੰਦ ਮਾਂਗੂ ਚਮਕਦੀਏ

ਤੇਰੇ ਮਾਹੀ ਦਾ ਸੁਣੀਂਦਾ ਰੰਗ ਕਾਲ਼ਾ

.......................

ਤੇਰਾ ਇਸ਼ਕ ਤਾਂ ਤੋਲ਼ੇ ਚੜ ਗਿਆ

ਮੇਰਾ ਚੜ ਗਿਆ ਧੜੀਆਂ

ਸਾਰੇ ਦੇਸ ਵਿਚ ਖਬਰਾਂ ਹੋਗੀਆਂ

ਕਵੀਆਂ ਨੇ ਜੋੜੀਆਂ ਲੜੀਆਂ

ਇਸ਼ਕ ਕਮਾ ਲੈ ਵੇ

ਇਸ ਵਿਚ ਮੌਜਾਂ ਬੜੀਆਂ

.......................

ਉੱਚੇ ਟਿੱਬੇ ਮੈਂ ਤਾਣਾ ਤਣਦੀ

ਪੱਟ ਪੱਟ ਸਿਟਦੀ ਕਾਨੇ

ਏਸ ਦੇਸ ਮੇਰਾ ਜੀ ਨੀ ਲਗਦਾ

ਲੈ ਚੱਲ਼ ਦੇਸ ਬੇਗਾਨੇ

ਐਕਣ ਨੀ ਪੁੱਗਣੇ

ਗੱਲ਼ਾਂ ਨਾਲ ਯਰਾਨੇ

.......................

ਪਤਲਿਆ ਚੋਬਰਾ ਵੱਢਦਾ ਬੇਰੀਆਂ

ਵੱਢ ਵੱਢ ਲਾਉਂਦਾ ਝਾਫੇ

ਹਾਕ ਨਾ ਮਾਰੀਂ ਵੇ

ਮੇਰੇ ਸੁਣਨਗੇ ਮਾਪੇ

ਸੈਨਤ ਮਾਰ ਲਈਂ

ਮੈਂ ਆ ਜੂੰਗੀ ਆਪੇ

ਲੌਂਗ ਕਰਾ ਮਿੱਤਰਾ

ਮਛਲੀ ਕਰਾਉਣਗੇ ਮਾਪੇ

.......................

ਮਾਏਂ ਨੀ ਮੈੰਨੂ ਜੁੱਤੀ ਕਰਾਦੇ

ਹੇਠ ਲਵਾ ਦੇ ਖੋਖੇ

ਪੂਰਨ ਵਰਗੇ ਕਤਲ ਕਰਾਤੇ

ਮਿਰਜੇ ਵਰਗੇ ਝੋਟੇ

ਫੋਕੀ ਯਾਰੀ ਝੂਠੇ ਲਾਰੇ

ਆਸ਼ਕ ਹੋ 'ਗੇ ਖੋਟੇ

ਮੁੜਜਾ ਤੂੰ ਮਿੱਤਰਾ

ਵੀਰ ਕਰਨਗੇ ਟੋਟੇ

........................

ਲਿਆ ਵੀਰਾ ਤੇਰਾ ਗਾਨਾ ਗੋਠ ਦਿਆਂ

ਲਾਕੇ ਸਿਲਮ ਸਿਤਾਰੇ

ਪੰਜ ਰੁਪੱਈਏ ਭੈਣ ਨੂੰ ਦੇ ਦੀਂ

ਪੰਜ ਟੇਕਦੀਂ ਡੇਰੇ

ਰੱਬ ਨੇ ਰੂਪ ਦਿੱਤਾ

ਬੰਨ਼ ਸ਼ਗਨਾਂ ਦੇ ਸਿਹਰੇ

........................

ਨਿਊਂਆਂ ਦੇ ਮੁੰਡੇ ਬੜੇ ਸ਼ੁਕੀਨੀ

ਗਲੀਏਂ ਮਾਰਦਾ ਗੇੜੇ

ਹੱਥੀਂ ਟਾਕੂਏ ਕੱਛੀਂ ਬੋਤਲਾਂ

ਠਾਣੇਦਾਰ ਨੇ ਘੇਰੇ

ਪੈਸੇ ਆਲ਼ੇ ਦੀ ਧੀ ਨਾ ਲੈਂਦੇ

ਪੁੰਨ ਦੇ ਲੈਂਦੇ ਫੇਰੇ

ਪਲਕਾਂ ਕਿਉਂ ਸਿੱਟੀਆਂ

ਝਾਕ ਸਾਹਮਣੇ ਮੇਰੇ

.........................

Wednesday 6 August, 2008

ਤੈਂ ਮੈਂ ਮੋਹ ਲਈ ਵੇ


ਗਿੱਧਾ ਗਿੱਧਾ ਕਰੇਂ ਮੇਲਣੇ

ਗਿੱਧਾ ਪਊ ਬਥੇਰਾ

ਪਿੰਡ ਵਿਚ ਤਾਂ ਰਿਹਾ ਕੋਈ ਨਾ

ਕੀ ਬੁੱਢੜਾ ਕੀ ਠੇਰਾ

ਬੰਨ ਕੇ ਢਾਣੀਆਂ ਆ ਗੇ ਚੋਬਰ

ਢੁੱਕਿਆ ਸਾਧ ਦਾ ਡੇਰਾ

ਨੱਚ ਲੈ ਕਬੂਤਰੀਏ

ਦੇ ਦੇ ਸ਼ੌਂਕ ਦਾ ਗੇੜਾ

........................

ਆਰਾ - ਆਰਾ - ਆਰਾ

ਗੱਡੀਆਂ ਪੁਲ਼ ਚੜੀਆਂ


ਜਿਉਣੇ ਮੌੜ ਨੇ ਮਾਰਿਆ ਲਲਕਾਰਾ

ਜਾਨੀ ਸਭ ਭੱਜਗੇ

ਜਿਉਣਾ ਸੁਣੀਂਦਾ ਸੂਰਮਾ ਭਾਰਾ

ਭੱਜ ਕੇ ਜਿਉਣੇ ਨੇ

ਜਿੰਦਾ ਤੋੜ ਲਿਆ ਰੋਕੜੀ ਆਲਾ

ਰੋਕੜੀ ਨੂੰ ਐਂ ਗਿਣਦਾ

ਜਿਉਂ ਬਲ਼ਦ ਵੇਚ ਲਿਆ ਨਾਰਾ

ਇੱਕ ਦਿਨ ਛਿਪ ਜੇਂਗਾ

ਦਾਤਣ ਵਰਗਿਆ ਯਾਰਾ



ਜਾਂ


ਵੇ ਕਦ ਕਰਵਾਵੇਂਗਾ

ਲੌਂਗ ਬੁਰਜੀਆਂ ਵਾਲਾ

........................

ਬਾਰੀਂ ਬਰਸੀਂ ਖੱਟਣ ਗਿਆ ਸੀ

ਖਟ ਕੇ ਲਿਆਂਦੀ ਤਰ ਵੇ

ਮੇਰਾ ਉੱਡੇ ਡੋਰੀਆ

ਮਹਿਲਾਂ ਵਾਲੇ ਘਰ ਵੇ

.......................

ਬਾਰੀਂ ਬਰਸੀਂ ਖੱਟਣ ਗਿਆ ਸੀ

ਖਟ ਕੇ ਲਿਆਂਦਾ ਨਾਲਾ

ਤੇਰੀ ਮੇਰੀ ਨਹੀਓਂ ਨਿਭਣੀ

ਮੈਂ ਗੋਰੀ ਤੂੰ ਕਾਲਾ

.......................

ਸਹੁਰਾ ਜੀ ਇੱਕ ਅਰਜ ਕਰੇਨੀਆਂ

ਅਰਜ ਕਰੇਨੀਆਂ ਥੋਡੀ ਦਾੜੀ ਨੂੰ

ਸਾਨੂੰ ਅੱਡ ਕਰ ਦਿਓ

ਅੱਡ ਕਰ ਦਿਓ ਆਂਉਦੀ ਹਾੜੀ ਨੂੰ

.......................

ਪੱਤੋ ਕੋਲੇ ਖਾਈ ਸੁਣੀਂਦੀ

ਖਾਈ ਕੋਲ਼ੇ ਦੀਨਾ

ਤੈਂ ਮੈਂ ਮੋਹ ਲਈ ਵੇ

ਕਾਲਜ ਦਿਆ ਸ਼ੁਕੀਨਾ

........................

ਦਿਉਰ ਮੇਰੇ ਨੇ ਇੱਕ ਦਿਨ ਲ਼ੜ ਕੇ

ਖੂਹ 'ਤੇ ਪਾ ਲਿਆ ਚੁਬਾਰਾ

ਤਿੰਨ ਭਾਂਤ ਦੀ ਇੱਟ ਲੱਗ ਜਾਂਦੀ

ਚਾਰ ਭਾਂਤ ਦਾ ਗਾਰਾ

ਆਕੜ ਕਾਹਦੀ ਵੇ

ਜੱਗ ਤੇ ਫਿਰੇਂ ਕੁਆਰਾ

........................

ਰਾਈ -ਰਾਈ -ਰਾਈ

ਧੁੱਪ ਮਾਂਗੂ ਚਮਕਦੀਏ

ਤੇਰੀ ਕੁੜੀਆਂ ਕਰਨ ਵਡਿਆਈ

ਗਿੱਧੇ ਵਿੱਚ ਫਿਰੇਂ ਮੇਲ਼ਦੀ

ਗੁੱਤ ਗਿੱਟਿਆਂ ਤਕ ਲਮਕਾਈ

ਚੋਬਰਾਂ ਦਾ ਮੱਚੇ ਕਾਲਜਾ

ਗੇੜਾ ਦੇ ਕੇ ਤੂੰ ਬੋਲੀ ਪਾਈ

ਗਿੱਧੇ 'ਚ ਧਮੱਚੀ ਪੱਟ 'ਤੀ

ਸਿਫ਼ਤਾਂ ਕਰੇ ਲੋਕਾਈ

ਰਸਤਾ ਛੋਡ ਦਿਉ

ਹੀਰ ਮਜਾਜਣ ਆਈ

........................

ਮਾਏਂ ਨੀ ਗਜ਼ ਕਪੜਾ ਲੈ ਦੇ

ਗਜ਼ ਕੱਪੜੇ ਦੀ ਸੁੱਥਣ ਸਮਾਮਾਂ

ਸੁੱਥਣ ਪਾ ਕੇ ਪਿੰਡ ਵਿੱਚ ਜਾਮਾਂ

ਪਿੰਡ ਦੇ ਮੁੰਡੇ ਆਖਣ ਮੋਰਨੀ

ਮੈਂ ਅੱਖ ਨਾ ਫ਼ਰਕਾਮਾਂ

ਵਿੱਚ ਦੀ ਮੁੰਡਿਆਂ ਦੇ

ਸੱਪ ਬਣ ਕੇ ਲੰਘ ਜਾਮਾਂ

.........................

ਅੱਡੀ ਤਾਂ ਮੇਰੀ ਕੌਲ ਕੰਚ ਦੀ

'ਗੂਠੇ ਤੇ ਸਿਰਨਵਾਂ

ਲਿਖ ਲਿਖ ਚਿੱਠੀਆਂ ਡਾਕ 'ਚ ਪਾਵਾਂ

ਧੁਰ ਦੇ ਪਤੇ ਮੰਗਾਵਾਂ

ਰੱਖ ਲਿਆ ਮੇਮਾਂ ਨੇ

ਵਿਹੁ ਖਾ ਕੇ ਮਰ ਜਾਵਾਂ

ਤੇਰੀ ਫ਼ੋਟੋ 'ਤੇ

ਬਹਿ ਕੇ ਦਿਲ ਪਰਚਾਵਾਂ


ਜਾਂ


ਦਾਰੂ ਪੀਂਦੇ ਨੂੰ

ਕੰਚ ਦਾ ਗਲਾਸ ਫੜਾਵਾਂ


ਜਾਂ


ਮੂਹਰੇ ਲੱਗ ਪਤਲਿਆ

ਮਗਰ ਝੂਲਦੀ ਆਂਵਾਂ

..........................

Wednesday 30 July, 2008

ਦੋ ਸ਼ਬਦ(Preface)


ਮੇਰਾ ਯਤਨ ਆ ਕਿ ਚੰਦ ਕੁ ਬੋਲੀਆਂ ਦੀ collection ਕਰਾਂ । ਬਾਕੀ, ਸਭਨਾਂ ਦੇ ਸਹਿਯੋਗ ਦੀ ਗੱਲ ਆ ।


ਗਿੱਧਾ , ਪੰਜਾਬ ਦੀ (Fudal) ਅਸਲੀਅਤ ਨੂੰ ਜਾਨਣ ਦਾ , ਰਿਸ਼ਤਿਆਂ ਦੀ ਥਾਹ ਪਾਉਣ ਦਾ ਸਭ ਤੋਂ ਢੁਕਵਾਂ ਜ਼ਰੀਆ ਹੈ ।


ਗਿੱਧੇ ਨੂੰ ਸੰਪਾਦਤ ਕਰਨ ਦਾ ਤਾਂ ਕੋਈ ਇਰਾਦਾ ਨਹੀਂ , ਪਰੰਤੂ 'ਤੱਤੀਆਂ' ਬੋਲੀਆਂ ਤੋਂ ਤਾਂ ਗੁਰੇਜ਼ ਕਰਾਂਗਾ ਹੀ ।



ਬੇਨਤੀ :


ਵਧੀਆ ਬੋਲੀਆਂ ਭੇਜੋ , ਭਾਂਵੇਂ ROMAN ਅੱਖਰਾਂ 'ਚ ਹੀ ਸਹੀ ।


Sunday 20 July, 2008

SAT SHIREE AKAAL










ਸ਼ੁਭ ਕਰਮਨ
ਸੇ ਕਬਹੂੰ ਨਾ
ਟਰੋਂ


Free Web Traffic Reseller/Advertiser Account


FreeWebSubmission.com

-->habitamos
-->
Online Advertising

Visit blogadda.com to discover Indian blogs
India Counts





Free Hit Counters

Free Counter






Entertainment